पुणे, ता. ५ ः पुणे जिल्ह्यातील एका दिवसातील नवीन कोरोना रुग्णांची संख्या बुधवारी (ता. ५) पुन्हा तीन हजारांच्या घरात पोचली आहे. जिल्ह्यात दिवसभरात एकूण दोन हजार ८१३ नवे रुग्ण आढळून आले आहेत. याउलट फक्त २२८ जण कोरोनामुक्त झाले आहेत. अन्य एका रुग्णाचा कोरोनाने मृत्यू झाला आहे. हा कोरोना मृत्यू जिल्हा परिषद कार्यक्षेत्रातील आहे.
जिल्ह्यातील दिवसातील एकूण नवीन रुग्णांत पुणे शहरातील १ हजार ८०५ रुग्णांचा समावेश आहे. दिवसभरात पिंपरी चिंचवडमध्ये ५९०, जिल्हा परिषद कार्यक्षेत्रात २८१, नगरपालिका हद्दीत ८० आणि कॅंटोन्मेंट बोर्ड क्षेत्रात ५७ नवे रुग्ण आढळून आले आहेत. कोरोनामुक्तांमध्ये पुणे शहरातील १३१, पिंपरी चिंचवडमधील २७, जिल्हा परिषद कार्यक्षेत्रातील ४१, नगरपालिका हद्दीतील ११ आणि कॅंटोन्मेंट बोर्ड क्षेत्रातील ११ जणांचा समावेश आहे.
सद्यःस्थितीत पुणे जिल्ह्यात ८ हजार २०१ सक्रिय कोरोना रुग्ण आहेत. यापैकी शहर व जिल्ह्यातील विविध रुग्णालयांत ८१८ रुग्णांवर उपचार सुरू आहेत. उर्वरित ७ हजार ३८३ जण गृह विलगीकरणात आहेत. एकूण सक्रिय कोरोना रुग्णांमध्ये पुणे शहरातील ५ हजार ४६४ रुग्ण आहेत. शहरातील एकूण रुग्णांपैकी ४४७ जणांवर विविध रुग्णांलयात उपचार सुरु आहेत. उर्वरित ५ हजार १७ जण गृहविलगीकरणात आहेत.