पुणे, ता. ७ ः कोरोनामुळे मागील दोन वर्षांपासून ब्रेक लागलेल्या राज्य नाट्य स्पर्धेला अखेर मुहूर्त लागला आहे. हौशी मराठी राज्य नाट्य स्पर्धेचे वेळापत्रक जाहीर झाले असून, १५ जानेवारीपासून राज्यभरात या स्पर्धेच्या प्राथमिक फेरीला प्रारंभ होईल. पुणे केंद्रावर यंदा १५ संघांचे सादरीकरण होणार असून, स्पर्धेची प्राथमिक फेरी सावित्रीबाई फुले नाट्यगृहात रंगणार आहे. वाढत्या कोरोना रुग्णसंख्येच्या पार्श्वभूमीवर सुरक्षित वातावरणात स्पर्धा पार पाडण्याचे आव्हान सरकारपुढे आहे.
उदयोन्मुख कलाकारांना हक्काचे व्यासपीठ मिळावे, यासाठी राज्य सरकारतर्फे प्रायोगिक अर्थात हौशी नाटकांसाठी राज्य नाट्य स्पर्धेचे आयोजन करण्यात येते. २०१९ मध्ये ५९ वी राज्य नाट्य स्पर्धा पार पडली होती. यंदा या स्पर्धेचा मुहूर्त लागला असून, स्पर्धेचे ६० वे अर्थात हीरक महोत्सवी वर्ष असल्याने त्याला विशेष महत्त्व प्राप्त झाले आहे. १५ जानेवारीपासून राज्यातील एकूण १९ केंद्रांवर मराठी राज्य नाट्य स्पर्धेची प्राथमिक फेरी रंगणार असून, त्यानंतर अंतिम फेरी रंगेल. तर फेब्रुवारी महिन्यात टप्प्याटप्याने हिंदी राज्य नाट्य, संस्कृत राज्य नाट्य, बाल राज्य नाट्य, दिव्यांग बाल राज्य नाट्य व संगीत राज्य नाट्य स्पर्धा पार पडणार आहेत.
पुण्यातील स्पर्धेला ‘अवकाश कलामंच’ संस्थेच्या ‘अनागत’ या नाटकाने प्रारंभ होणार आहे. गंज पेठेतील ज्ञानज्योती सावित्रीबाई फुले नाट्यगृहात दररोज सायंकाळी ७ वाजता एका नाटकाचे सादरीकरण होईल. २९ जानेवारीला ‘योगेश पार्क सहकारी गृहरचना संस्थे’च्या ‘बावळेवाडी’ या नाटकाने प्राथमिक फेरीची सांगता होईल. या वेळी १५ संघांनी प्रवेश घेतल्याने पुणे केंद्रातून दोन नाटकांची अंतिम फेरीसाठी निवड केली जाईल. दरम्यान, शहरात वाढत्या कोरोना रुग्णांच्या पार्श्वभूमीवर सुरक्षितपणे स्पर्धा पार पडण्याचे आव्हान आहे. मात्र सरकारने यासंदर्भात आखलेल्या नियमावलीचे स्पर्धेदरम्यान काटेकोर पालन करण्यात येईल, असे सांस्कृतिक कार्य संचालनालयाच्या अधिकाऱ्यांनी स्पष्ट केले.
पुणे केंद्रावरील स्पर्धेचे नियोजन -
सहभागी संघ - १५
कालावधी - १५ ते २९ जानेवारी
वेळ - सायंकाळी ७ वाजेपासून
स्थळ - ज्ञानज्योती सावित्रीबाई फुले नाट्यगृह, गंज पेठ
कोरोनाच्या पार्श्वभूमीवरील नियम -
- नाट्यगृहात आसन क्षमतेच्या ५० टक्के प्रेक्षकांनाच प्रवेश
- मास्क वापरणे बंधनकारक
- लशीचे दोन्ही डोस घेतलेले असणे आवश्यक
- कलाकारांचेही लसीकरण पूर्ण असणे गरजेचे
- शारीरिक अंतराचे पालन
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.