पुणे, ता. ७ ः रस्त्यालगत थांबलेल्या ज्येष्ठ नागरिकास पोलिस असल्याची बतावणी करून दोघांनी त्यांच्याकडील ४८ हजार रुपये किमतीच्या सोन्याच्या तीन अंगठ्या लंपास केल्या, ही घटना कात्रज परिसरात घडली. याप्रकरणी एका ज्येष्ठ नागरिकाने भारती विद्यापीठ पोलिस ठाण्यात फिर्याद दिली. फिर्यादी हे शुक्रवार पेठ परिसरात राहातात. वैयक्तीक कामानिमित्त ते मंगळवारी कात्रज परिसरात आले होते. सायंकाळच्या सुमारास ते कात्रज-कोंढवा रस्त्यावर थांबले होते. तेव्हा दोघांनी त्यांना आपण पोलिस असल्याची बतावणी करून तीन सोन्याच्या अंगठ्या कागदात गुंडाळून ठेवण्याचा बहाणा केला, तसेच त्यांचे लक्ष विचलीत करून अंगठ्या चोरून नेल्या.