अनुसूचित जाती महिलेसाठी
देहूचे नगराध्यक्षपद राखीव

देहू, ता. २७ ः राज्यातील नगरपंचायतीच्या नगराध्यक्षपदाचे आरक्षण सोडत गुरुवारी (ता. २७ ) जाहीर झाली. यात नव्याने स्थापन झालेल्या देहू नगरपंचायतीमध्ये अनुसूचित जाती महिलेसाठी नगराध्यक्षपद राखीव आहे.
देहू नगरपंचायतीचे मुख्य कार्यकारी अधिकारी डॅा. प्रशांत जाधव यांनी सांगितले, की आरक्षण सोडतीमध्ये देहू नगरपंचायतीचे नगराध्यक्ष पद अनुसूचित जाती महिलेसाठी राखीव आहे.
देहू नगरपंचायतीमध्ये १७ सदस्य आहे. आमदार सुनील शेळके यांच्या मार्गदर्शनाखाली राष्ट्रवादी कॉंग्रेसचे १४ सदस्य निवडून आले आहेत. तर दोन अपक्ष आणि एक भारतीय जनता पक्षाचा असे एकूण १७ सदस्य आहेत. सतरा प्रभागापैकी दोन प्रभाग अनुसूचित महिलांसाठी राखीव होते. यात प्रभाग क्रमांक तीनमध्ये पूजा दिवटे आणि प्रभाग क्रमांक नऊ मध्ये स्मिता चव्हाण या दोन्ही राष्ट्रवादी कॉंग्रेसच्या उमेदवार विजयी झालेल्या आहेत. त्यामुळे नगराध्यक्ष पदावर दिवटे अथवा चव्हाण यापैकी कोणाची वर्णी लागते, याबाबत देहूकरांमध्ये उत्सुकता आहे.