पुणे, ता. ११ : महाराष्ट्र प्रदेश काँग्रेसचे कार्याध्यक्ष चंद्रकांत हंडोरे यांना जिवे मारण्याची सुपारी देणाऱ्या गुन्हेगारास अटक करण्यात यावी, अशी मागणी भीमशक्ती पुणे शहर संघटनेने केली आहे. धमकी देणाऱ्या व्यक्तीस आणि त्यामागील मुख्य सूत्रधारास अटक करण्यात यावी. तसेच, हंडोरे यांना पोलिस सुरक्षा देण्यात यावी, अशी मागणी भीम शक्तीचे शहराध्यक्ष शिलार रतनगिरी यांनी जिल्हाधिकाऱ्यांमार्फत मुख्यमंत्री यांच्याकडे निवेदनाद्वारे केली आहे.
भीमशक्तीचे शहर उपाध्यक्ष राजू रोकडे, रमेश सूर्यवंशी, विजय गायकवाड, सरचिटणीस राजू भालशंकर, बुद्धभूषण निकम, पर्वती मतदार संघाचे अध्यक्ष विकास चाबुकस्वार, संदीप खिलारे आदी कार्यकर्ते या वेळी उपस्थित होते. दोषींवर कारवाई न झाल्यास तीव्र आंदोलन करण्याचा इशाराही या वेळी देण्यात आला.