पुणे, ता. १२ : तलाठ्यांपाठोपाठ आता भूकरमापकांनाही (मोजणी करणारे कर्मचारी) लॅपटॉप देण्याचा निर्णय राज्य सरकारने घेतला आहे. या निर्णयामुळे जागेवर हद्दी दाखवून मोजणी प्रकरणे तत्काळ निकाली काढणे सोयीचे होणार असून, मोजणीच्या कामकाजातसुद्धा गतिमानता वा पारदर्शकता येणार आहे. राज्यातील भूमि अभिलेख विभागाचे मुख्य काम जमिनीची मोजणी करून भूमि अभिलेखानुसार जमिनीच्या हद्दी कायम करणे, जमिनीवर झालेले पोटहिस्सा मोजणी करून त्याचे नविन पोटहिस्सा अभिलेख तयार करणे, प्रत्यक्ष जागेवर जाऊन मोजणी करणे. मोजणी झाल्यानंतर मोजणी नकाशा तयार करतात, त्याचबरोबर भूमि अभिलेख त्यावर बसवून हद्दी दाखविणे, जमिनीच्या खुणा दर्शविणे, आदी कामे भूकरमापक करतात. या सर्व तांत्रिक बाबी हाताळण्यासाठी लॅपटॉपची आवश्‍यकता आहे. जर लॅपटॉप पुरविले, तर जागेवर हद्दी दाखवून मोजणी प्रकरणे तत्काळ निकाली काढणे सोयीचे होणार आहे. जनतेच्या तक्रार निवारण होण्यास मदत होणार आहे. पहिल्या टप्प्यात राज्यातील ८०४ भूकरमापकांना लॅपटॉप दिले जाणार आहेत. त्यासाठी राज्य सरकारने भूमी अभिलेख विभागाला निधी उपलब्ध करून दिला आहे.