पुणे, ता. १२ : स्वारगेट स्थानकातून खासगी बस चालकांना मंगळवारी अचानक प्रवासी वाहतुकीस बंदी घालण्यात आली होती. त्यावर चालकांनी संताप व्यक्त केला होता. एसटी प्रशासनाने नरमाईची भूमिका घेत पुन्हा स्थानकातून प्रवासी वाहतुकीची विनंती केली. प्रवाशांची गैरसोय होऊ नये, म्हणून आज (ता. १२) संध्याकाळी ६ वाजल्यापासून पुन्हा स्थानकातून खासगी बस मधून प्रवासी वाहतूक सेवा सुरु करण्यात आली. असे राज्य प्रवासी व मालवाहतूक संघटनेचे अध्यक्ष बाबा शिंदे यांनी सांगितले.
पुन्हा प्रवासी वाहतूक सुरु करावी, यासाठी प्रशासनाने खासगी बस मालकांना बैठकीसाठी बोलावले होते. बैठकीत प्रशासनाने दिलगिरी व्यक्त करताच पुन्हा प्रवासी वाहतूक सुरू करण्याचा निर्णय घेण्यात आला. यावेळी महाराष्ट्र राज्य व पुणे बस असोसिएशनचे पदाधिकारी शिवराज थोरात व निखिल भोसले उपस्थित होते, असे शिंदे यांनी सांगितले.
दरम्यान, एसटी महामंडळाचे १७ कर्मचारी बुधवारी (चालक, वाहक) कामावर हजर झाले आहेत. त्यामुळे एसटी बससेवेला गती मिळणार आहे. अजूनही कर्मचारी कामावर हजर होणार आहेत. १५ कंत्राटी चालक या पूर्वीच कामावर हजर झाले आहेत, असे ज्ञानेश्वर रणवरे यांनी सांगितले.

खासगी बस व्यवसायिकांची आज बैठक घेण्यात आली. बैठकीत आरटीओचे अधिकारीही उपस्थित होते. स्थानकात गर्दी होऊ नये म्हणून सोलापूर फलाटावर खासगी बस गाड्यांना जागा देण्यात आली आहे.
-ज्ञानेश्वर रणवरे, विभागीय वाहतूक अधिकारी.

स्वारगेट स्थानकातून अद्याप एकही कर्मचारी कामावर हजर झाला नाही. स्वारगेट स्थानकात एकूण १३५ कर्मचारी आहेत. त्यापैकी कोणता कर्मचारी कामावर हजर झाला, हे प्रशासनाने दाखवून द्यावे. प्रशासन खोटे दावे करत आहे.पुणे विभागातील सर्वच कर्मचारी दुखवट्यात सहभागी आहेत.
-संजय मुंडे, एसटी कर्मचारी.