पुणे, ता. १२ : कोरोनाचा संसर्ग वाढत असताना देखील महापालिकेत किरकोळ कामासाठी येणाऱ्या नागरिकांसह कार्यकर्त्यांची मोठी गर्दी होत आहे. आजपासून (ता.१३) या सर्वांना प्रवेश बंदी केली. केवळ अत्यावश्यक कामासाठी येणारे नागरिक नगरसेवक व कर्मचाऱ्यांना महापालिकेत प्रवेश दिला जात होता. अचानक महापालिकेचे दारे बंद झाल्याने नागरिकांची गर्दी नियंत्रित करताना व त्यांची समजूत घालताना सुरक्षारक्षकांची चांगलीच तारांबळ उडाली.

गेल्या काही दिवसांपासून शहरात रोजचा कोरोना बांधितांचा आकडा हजाराच्यावर आहे. शासनाने गर्दी टाळण्यासाठी निर्बंध लावले आहेत. सर्व कार्यक्रमांच्या उपस्थितीवर बंधन आले आहे. शासकीय कार्यालये ५० टक्के उपस्थितीमध्ये सुरू आहेत. पुणे महापालिकेनेही हे निर्बंध लागू केले आहेत. पण, महापालिकेचे मुख्य भवन आणि क्षेत्रिय कार्यालय येथे मोठी गर्दी होत आहे. पदाधिकारी आणि अधिकाऱ्यांच्या केबिन बाहेर नागरिकांच्या रांगा लागत आहेत. ही गर्दी टाळण्यासाठी अतिरिक्त आयुक्तांनी स्वतंत्र आदेश काढलेत. अत्यावश्‍यक कामा शिवाय महापालिकेच्या मुख्य इमारत, परिमंडळ कार्यालय, क्षेत्रीय कार्यालयांमध्ये लोकप्रतिनिधी, अधिकारी, कर्मचारी यांच्या शिवाय कोणालाही प्रवेश देऊ नये.
जे नागरिक सुनावणी किंवा पूर्वनियोजित कामासाठी येणार आहेत. त्यांना पास देण्याची व्यवस्था करण्याचे आदेश दिले आहेत. हे आदेश १० जानेवारी रोजी दिले असेल तरी त्याची अंमलबजावणी महापालिकेत आजपासून केली. महापालिकेच्या जुन्या इमारतीच्या बाजूने अत्यावश्यक कामातील नागरिकांना प्रवेश दिला जात होता. तर नवीन इमारतीच्या गेटमधून केवळ नगरसेवक, पदाधिकारी यांना प्रवेश होता. हे गेट बंद झाल्याने नागरिकांनी सुरक्षा रक्षकांशी हुज्जत घालण्यास सुरुवात केली. कार्यकर्त्यांनी देखील नगरसेवकांना फोन करून दबाव आणण्यास सुरुवात केली. यातून सुरक्षा रक्षक आणि कार्यकर्ते यांच्यात वादही झाले.

वशिल्याची गर्दी
सकाळी महापालिकेत नियमाची कडक अंमलबजावणी सुरु असती तरी दुपारनंतर अनेक कार्यकर्ते नगरसेवकांसोबत पालिकेत आले. तसेच ठेकेदारांसोबतही अनेकजण पालिकेच्या इमारतीमध्ये आले. त्यामुळे पुन्हा एकदा पालिका भवनात गर्दी दिसून आल्याने प्रशासनाच्या आदेश केवळ कागदावरच राहिले.