पुणे, ता. १५ ः ‘काका मला वाचवा’ अशी आर्त हाक २५० वर्षानंतरसुद्धा पुणेकर विसरले नाहीत. तेव्हा कपटाने नारायणराव पेशवे यांना मारलं होतं, तसेच आता महाराष्ट्र शासनाचे अधिकारी छळ कपट करून १२ लाख रिक्षाचालकांना व ६० लाखांहून रिक्षा व्यावसायिकांच्या कुटुंबीयांना संपवण्याचा प्रयत्न करत आहेत. ज्या भाबडेपणाने नारायणराव, रघुनाथराव यांना ‘काका मला वाचवा’ची साद घालत होते, त्याचप्रमाणे रिक्षाचालकांनी रिक्षावर ‘दादा मला वाचवा,’ असे पोस्टर लावून उपमुख्यमंत्री अजित पवार यांना साद घातली आहे. असे ‘बघतोय रिक्षावाला’ संघटनेचे अध्यक्ष डॉ. केशव (नाना) क्षीरसागर यांनी सांगितले.

टॅक्सी-बाइक आणि रिक्षाचालक यांच्यात वाद सुरू आहे. टॅक्सी-बाइक ही सेवा बंद करण्यात यावी, अशी रिक्षाचालकांची मागणी आहे. ४ जानेवारी रोजी रिक्षाचालकांच्या जिल्हाधिकारी कार्यालयावरील धडकलेल्या विराट मोर्चानंतर अजित पवार यांनी एका आठवड्यात टॅक्सी-बाइक बंद करण्याचे आश्वासन दिले होते. मात्र, अद्याप कारवाई झाली नाही. हे प्रादेशिक परिवहन विभागाने मान्य करून सायबर गुन्हे विभागाला ओला, उबर, रॅपिडो आणि झूम हे ॲप बंद करण्याचे आदेश दिले आहेत. परंतु, आता सायबर विभाग व आरटीओ हे काम आपले नाही म्हणत एकमेकांकडे बोटे दाखवत आहेत. या सगळ्यामध्ये रिक्षाचालकांचे अतोनात हाल होत आहेत. दिवसागणिक ५०० ते ७०० रुपयांचे रोज नुकसान होत असून, ९० टक्के उत्पन्न गेल्या आठवडाभरापासून कमी झाले आहेत. दिवसाला फक्त ५० ते १०० रुपयांचा धंदा होत आहे. अनेकांची तर बोहनीदेखील होत नाही. परंतु आजतागायत फक्त कागदोपत्री कारवाई झाली असून, पुणे आणि पिंपरी-चिंचवड येथे ३० हजारांहून अधिक बेकायदा टॅक्सी-बाइक काम करत आहेत, असे क्षीरसागर यांनी सांगितले.