पुणे, ता. १९ : जिल्हा रुग्णालय नगर येथील कोविड अतिदक्षता विभागामध्ये (आयसीयू) लागलेल्या आगीबाबतचा अहवाल समितीने सादर केला आहे. मात्र, या अहवालातील माहिती सरकारकडून लपविली जात आहे. तसेच, यावर पुढे कोणतीही कार्यवाही न करता केवळ कागदी घोडे नाचविले जात आहेत, असा आरोप करून नगर येथील जळीत हत्याकांडाची जबाबदारी कोण घेणार? हा प्रश्न अतिदक्षता विभाग तज्ज्ञ डॉ. प्राची साठे आणि न्याय वैद्यकीय सल्लागार डॉ. राजीव जोशी यांनी बुधवारी पत्रकार परिषदेत उपस्थित केला. (Ahmednagar fire hospital)

या आगीत १२ रुग्णांचा दुदैवी मृत्यू झाला, तर पाच रुग्ण जखमी झाले. या घटनेला जबाबदार नसतानाही डॉ. विशाखा शिंदे यांना अटक केली, त्यांना पोलिस आणि न्यायालयीन कोठडीत अमानवी वागणूक देण्यात आली. त्यांच्या मानवी हक्कांची पायमल्ली झाली, असे डॉ. शिंदे यांनी न्यायालयाला दिलेल्या प्रतिज्ञापत्रात नमूद केले आहे. यावरून या घटनेचा निषेध व्यक्त करण्यासाठी डॉ. साठे आणि डॉ. जोशी यांनी पत्रकार परिषदेचे आयोजन केले होते. डॉ. साठे म्हणाल्या, ‘‘डॉ. शिंदे अपघाताला जबाबदार नव्हत्या. त्यांना आग विझविण्याचे कोणतेही प्रशिक्षण दिले नव्हते, तरीसुद्धा त्यांनी रुग्णांना वाचविण्यासाठी प्रयत्न केले. आग लागण्यात त्यांचा कोणताही दोष नसताना, त्यांना बेकायदा अटक झाली.’’