पुणे, ता. २४ : पुणे जिल्ह्यातील मोजणीच्या कामाला आता अधिक गती येणार आहे. भूमि अभिलेख विभागाकडे ३५ रोव्हर मशिन दाखल झाले आहेत. या मशिनच्या साहाय्याने जिल्ह्यात महिन्याला सरासरी दोन हजार ते बावीसशे मोजणीची प्रकरणे निकाली लावणे शक्य होणार आहे. परिणामी, जमिनींची मोजणीसाठी जास्त वाट पाहावी लागणार नाही.

जमिनीची अचूक आणि कमी वेळेत मोजणी करण्यासाठी भूमि अभिलेख विभागाने ‘सर्व्हे ऑफ इंडिया’च्या मदतीने राज्यात ७७ ठिकाणी कॉर्स (कन्टिन्यूस ऑपरेशन रेफरन्स स्टेशन) उभारले आहे. या कॉर्सआधारे जीपीएस रीडिंग केवळ ३० सेकंदात घेता येते. कॉर्सचे रीडिंग रोव्हर रिसिव्ह करणार असून, हे रीडिंग टॅबमध्ये दिसणार आहे. हे रोव्हर खरेदी करण्यासाठी पुणे जिल्हा नियोजन समितीकडून दोन कोटी ९९ लाख रुपयांचा निधी उपलब्ध करून दिला होता. यातून ३५ रोव्हर खरेदी केले आहेत. यापूर्वी पहिल्या टप्प्यात ११ रोव्हर प्राप्त झाले. उर्वरित २४ रोव्हर जिल्हा अधिक्षक भूमि अभिलेख कार्यालयाला नुकतेच प्राप्त झाले आहेत. भूमि अभिलेख विभागाने १०० कर्मचाऱ्यांना रोव्हर वापरण्याचे प्रशिक्षणसुद्धा दिले आहे. एका रोव्हरमुळे दररोज चार ते पाच ठिकाणच्या मोजणी पूर्ण होणार आहेत. यामुळे जिल्ह्यात जमिनीची मोजणी गतीने वाढणार असून, मोजणीची प्रक्रिया अत्यंत कमी वेळात आणि अचूक होणार आहे.

- सध्या अशी होते मोजणी
जमीन मोजणीसाठी सध्या भूमी अभिलेख विभागाकडून ईटीएस मशिनच्या साहाय्याने मोजणी करण्यात येते. जागेवर जीपीएस रीडिंग घेऊन त्या क्षेत्राचे अक्षांश व रेखांश घेतले जाते. या अक्षांश व रेखांशच्या आधारे जमीन मोजणी करणे सोयीचे ठरते. मात्र, सध्याच्या अस्तित्वात असलेल्या तंत्रज्ञानानुसार अचूक जीपीएस रीडिंग घेण्यासाठी किमान एक ते चार तास लागतात.

- आता अशी होणार मोजणी
रोव्हर मशिनच्या माध्यमातून जीपीएस रीडिंग घेण्यासाठीचा हा वेळ कमी होणार आहे. हा वेळ कमी करण्यासाठी अभिलेख विभागाने सर्व्हे ऑफ इंडियाच्या मदतीने कॉर्स बसविले आहे. या कॉर्सआधारे जीपीएस रीडिंग केवळ ३० सेकंदात घेता येते.