पुणे, ता. २३ : सावित्रीबाई फुले पुणे विद्यापीठाशी संलग्न महाविद्यालये आणि शैक्षणिक संस्थांचे नामफलक मराठी भाषेत करावेत. तसेच विद्यापीठातील स्वतंत्र मराठी भाषा भवनाच्या स्थापनेला गती द्यावी, या मागण्यांचे निवेदन युवासेनेचे सहसचिव किरण साळी यांनी कुलगुरू डॉ. नितीन करमळकर यांना बुधवारी दिले. या मागण्यांवर निर्णय घेऊन मराठी संवर्धनाला चालना देण्यात येईल, असे आश्वासन कुलगुरूंनी दिले आहे.
सर्व संलग्न महाविद्यालये आणि शैक्षणिक संस्थांना तातडीने आपले नाम फलक मराठीत करण्याचे आदेश देण्यात येतील, त्याबाबत चोवीस तासांत पत्रक काढण्यात येईल. मराठी भाषेला चालना देण्यासाठी स्वतंत्र मराठी भाषा भवनाच्या इमारतीचे काम प्राधान्याने पूर्ण करण्यासाठी लवकर संबंधितांची बैठक घेण्यात येईल. तसेच मराठी भाषेचे संवर्धन करण्यात येईल, अशी ग्वाही ही कुलगुरूंनी दिल्याची माहिती किरण साळी यांनी दिली आहे. या वेळी कुलसचिव डॉ. प्रफुल्ल पवार, विद्यापीठ कक्षाचे आकाश शिंदे, रोहीत कुचेकर, युवती सेनेचे मनिषा धारणे, तृप्ती ढगे, दीपाली घाडगे, युवासेना पदाधिकारी तुफान उंडे, गौरव पापळ आदी उपस्थित होते.