पुणे, ता. ३० : बीटकॉईन (क्रिप्टोकरन्सी) या आभासी चलन फसवणूक प्रकरणात अटकेत असलेले माजी आयपीएस अधिकारी रवींद्रनाथ प्रभाकर पाटील यांची पत्नी आणि भावाचा अटकपूर्व जामीन अर्ज सत्र न्यायालयाने फेटाळला आहे. पोलिस कोठडीत चौकशी न करता गुन्ह्याचा तपास पूर्ण होवू शकत नाही, असे निरीक्षण न्यायालयाने नोंदवले आहे.
पाटील यांची पत्नी कांचन रवींद्रनाथ पाटील आणि भाऊ अमरनाथ प्रभाकर पाटील यांनी सत्र न्यायालयात अटकपूर्व जामिनासाठी अर्ज दाखल केला होता. हा अर्ज अतिरिक्त सत्र न्यायाधीश एस. बी. साळुंखे यांनी फेटाळला. बिटकॉईन या आभासी चलनाच्या फसवणूक प्रकरणात पोलिसांना तांत्रिक मदत करण्यासाठी नेमलेले सायबर तज्ज्ञ पंकज प्रकाश घोडे (वय ३८, रा. ताडीवाला रोड) आणि पाटील (वय ४५, रा. बिबवेवाडी) यांना पोलिसांनी अटक केली होती. तर पाटील यांच्या पत्नी व भावावर गुन्हा दाखल करण्यात आला आहे. त्यात अटकपूर्व जामीन मिळावा यासाठी दोघांनी न्यायालयात धाव घेतली होती. अर्जास सरकारी वकील उज्ज्वला रासकर यांनी विरोध केला.
पाटील यांच्यावतीने ॲड. रोहन नहार यांनी कामकाज पाहिले. पाटील यांच्यावर भारतीय दंड संहितेच्या कलम ४०९ नुसारचा गुन्हा लागू होत नाही. कारण ते ना सरकारी कर्मचारी नाही ना बँक कर्मचारी. आयटी ॲक्टनुसार दाखल असलेले कलमे हे जामीनपात्र आहेत, असा युक्तिवाद ॲड. नहार यांनी केला. न्यायालयीन कोठडी मंजूर झाल्यानंतर पाटील यांनी जामिनासाठी अर्ज केला आहे. त्यावर गुरुवारी (ता. ३१) निकाल होणार आहे. या गुन्ह्याचा तपास पोलिस निरीक्षक अंकुश चिंतामण करीत आहेत.