पुणे, ता. २१ ः व्यावसायिक अभ्यासक्रमांच्या प्रवेशासाठी घेतली जाणारी महाराष्ट्र राज्य सामाईक प्रवेश परीक्षा (सीईटी) पुढे ढकलली आहे. राष्ट्रीय स्तरावरील जेईई मेन आणि नीट परीक्षांच्या पार्श्वभूमीवर राज्य सरकारने हा निर्णय घेतला आहे. उच्च व तंत्र शिक्षण मंत्री उदय सामंत यांनी ट्विटरच्या माध्यमातून ही माहिती दिली आहे.
राज्यातील सीईटी परीक्षा पूर्वनियोजित वेळापत्रकानुसार जून महिन्यात ११ ते २८ तारखेच्या दरम्यान होणार होत्या. मात्र, आता त्या ऑगस्ट महिन्याच्या पहिल्या आठवड्यात होतील. परीक्षेच्या तारखा लवकरच जाहीर केल्या जातील, असेही सामंत यांनी म्हटले आहे. अभियांत्रिकीच्या प्रवेशासाठी होणारी जॉइंट एन्टरन्स एक्झाम अर्थात जेईई आणि वैद्यकीय प्रवेशासाठी होणारी नॅशनल एलिजिबिलीटी कम एन्टरन्स टेस्ट म्हणजेच नीट (NEET) जून व जुलै महिन्यात होणार आहेत. जेईई मेनचे पहिले सत्र २९ जून तर, दुसरे सत्र ३० जुलै २०२२ रोजी संपणार आहे. तसेच, नीट परीक्षा १७ जुलै २०२२ रोजी होणार आहे. या पार्श्वभूमीवर विद्यार्थ्यांना गोंधळ टाळण्यासाठी सीईटी परीक्षा पुढे ढकलल्या आहेत. सीईटी परीक्षेसाठी सध्या नोंदणी सुरू आहे. mhtcet2022.mahacet.org किंवा cetcell.mahacet.org या संकेतस्थळावर जाऊन विद्यार्थ्यांना सीईटीसाठी नोंदणी करता येईल.