पुणे, ता. ७ : देशभरातील भारतीय तंत्रज्ञान संस्था (आयआयटी) यांच्यासह नामांकित केंद्रीय संस्थांमध्ये अभियांत्रिकी आणि तंत्रशिक्षण अभ्यासक्रमांच्या प्रवेशासाठी राष्ट्रीय स्तरावर घेण्यात येणाऱ्या ‘जेईई मेन’ परीक्षा जवळपास दोन महिने पुढे ढकलण्यात आली आहे. यंदा ही परीक्षा दोन सत्रात होणार असून पहिल्या सत्रातील परीक्षा जूनमध्ये तर दुसऱ्या सत्रातील परीक्षा जुलैमध्ये होणार आहे.
देशभरातील विविध राज्यात बारावीची परीक्षा घेणाऱ्या बोर्डाच्या परीक्षा कोरोनाच्या पार्श्वभूमीवर दरवर्षीच्या तुलनेत यंदा उशिराने होत आहेत. त्यामुळे अभियांत्रिकी प्रवेशासाठी घेण्यात येणारी जेईई मेन परीक्षा पुढे ढकलण्यात यावी, अशी मागणी देशभरातील विद्यार्थ्यांकडून करण्यात येत होती. त्याची दखल घेत परीक्षेचे आयोजन करणाऱ्या नॅशनल टेस्टिंग एजन्सीने (एनटीए) ‘जेईई मेन’ परीक्षा पुढे ढकलण्याचा निर्णय घेतला. या परीक्षेचे पहिले सत्र २१ एप्रिल ते ४ मे या कालावधीत, तर दुसरे सत्र २४ ते २९ मे या कालावधीत होणार होते. आता सुधारित वेळापत्रकानुसार पहिल्या सत्रातील परीक्षा २० ते २९ जून दरम्यान होईल. दुसऱ्या सत्रातील परीक्षा २१ ते ३० जुलै दरम्यान होणार आहे. परीक्षेचे सविस्तर वेळापत्रक एनटीएच्या अधिकृत संकेतस्थळावर जाहीर करण्यात आले आहे.
जेईई मेनच्या पहिल्या सत्रातील परीक्षेसाठी नोंदणी प्रक्रिया आता संपली आहे. तसेच दुसऱ्या सत्रातील परीक्षेसाठी ऑनलाइन अर्ज भरण्याची प्रक्रिया लवकरच जाहीर केली जाईल, असेही एनटीएने स्पष्ट केले आहे.

परीक्षेच्या अधिक माहितीसाठी
- www.nta.ac.in
- https://jeemain.nta.nic.in/

सुधारित वेळापत्रक
पहिले सत्र : २० ते २९ जून २०२२
दुसरे सत्र : २१ ते ३० जुलै २०२२