पुणे, ता. ७ ः पादचारी भुयारी मार्गांची दुरवस्था झाल्याने नागरिकांमधून संताप व्यक्त केला जात असताना आता शहरात अजूनही मोजक्याच ठिकाणी दुरुस्तीचे काम हाती घेतले आहे. असे असताना आता महापालिका आयुक्त विक्रम कुमार यांनीही क्षेत्रीय कार्यालये, वाहतूक नियोजन विभाग, विद्युत विभागाने समन्वय ठेवून या सर्व पादचारी भुयारी मार्गांची त्वरित दुरुस्ती करून घ्या असे आदेश दिले आहेत. त्यामुळे आता तरी ढिम्म प्रशासनाला जाग येणार का? असा प्रश्न उपस्थित होत आहे.
पुणे महापालिकेतर्फे शहरात २० पादचारी भुयारी मार्ग बांधण्यात आलेले आहेत. या प्रत्येक भुयारी मार्गासाठी दोन ते तीन कोटी रुपये खर्च झाले आहेत. भुयारी मार्गात नागरिकांची वर्दळ असावी, सुरक्षीत वातावरण असावे यासाठी आतमध्ये गाळे काढण्यात आले. शहरातील प्रमुख चौकात तसेच ज्या ठिकाणी रस्ता ओलांडता येणार नाही अशा ठिकाणी हे भुयारी मार्ग बांधले. पण त्याकडे प्रशासनाचे दुर्लक्ष होत असल्याने घाणीचे साम्राज्य निर्माण झाले आहे. भुयारी मार्गात विद्युत व्यवस्था नसल्याने दिवसा देखील अंधार असतो. सुरक्षा रक्षक नसतो, त्यामुळे नागरिकांकडून त्याचा वापर करण्याची तयारी नसते. विशेष म्हणजे ‘सकाळ’ने केलेल्या पाहणीत हे भुयारी मार्ग म्हणजे तळीरामांचे अड्डे झाल्याचेही निदर्शनास आले. अशा स्थितीत महिला व इतर नागरिकांकडून या मार्गाचा वापर होत नाही. भर चौकातून वाहनांच्या गर्दीतून वाट काढताना नागरिकांची कसरत होत आहे.
‘सकाळ’ने याबाबत वृत्त प्रकाशित केल्यानंतर कोथरूड येथील वनाज, डहाणूकर कॉलनी, सोलापूर रस्ता येथील वैदुवाडी, फातिमानगर, आळंदी रस्ता याठिकाणची भुयारी मार्गांची स्वच्छता झाली. जंगली महाराज रस्ता, चंदननगर व इतर ठिकाणी प्रशासन ढिम्मच आहे. शहरातील भुयारी मार्गांची स्वच्छता करण्यासाठी वाहतूक नियोजन विभागाने क्षेत्रीय कार्यालयांना आदेश दिले आहेत. पण वाहतूक नियोजन विभागाकडूनच प्रमुख देखभाल दुरुस्ती, शटर, सुरक्षा ही कामे होत नसल्याने खोळंबा झाला आहे.
पुणे शहरातील पादचारी मार्ग स्वच्छ असले पाहिजेत. प्रकाश व्यवस्था, सीसीटीव्ही, सुरक्षा रक्षक यांची पुरेशी व्यवस्था असली असले तर नागरिकांकडून त्याचा चांगला वापर होतो. त्यामुळे क्षेत्रीय कार्यालयाच्या सहायक आयुक्त, विद्युत विभाग, वाहतूक नियोजन विभागाच्या अधिकाऱ्यांनी त्वरित भुयारी मार्ग स्वच्छ करून घ्यावेत. देखभाल दुरुस्तीची कामे वेगात करून त्याचा अहवाल सादर करावा असे आदेश दिले आहेत.
- विक्रम कुमार, आयुक्त तथा प्रशासक, पुणे महापालिका
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.