पुणे, ता. ७ : शिक्षक पात्रता परीक्षा (टीईटी) गैरव्यवहार प्रकरणी सायबर पोलिसांनी अटक केलेल्या दोघांच्या पोलिस कोठडीत नऊ एप्रिलपर्यंत वाढ करण्याचा आदेश न्यायालयाने दिला आहे. कलीम गुलशेर खान (वय ५२) आणि राजेंद्र विनायक सोळुंके (वय ५२) अशी पोलिस कोठडीत वाढ करण्यात आलेल्यांची नावे आहेत. या प्रकरणी पोलिस कोठडीची मुदत संपल्याने खान, सोळुंके यांना पुन्हा न्यायालयात हजर केले असता, या प्रकरणी यापूर्वी अटक आरोपी स्वप्नील पाटील याच्याकडे ४० अपात्र विद्यार्थ्यांना पात्र करण्यासाठी त्यांची माहिती व पैसे राजेंद्र सोळंके याने दिले असल्याचे पाटील याने सांगितले आहे. हे विद्यार्थी कोण होते? याबाबत सोळुंके याच्याकडे तपास केला असता तो तपासात सहकार्य करत नाही. यापूर्वी अटक संतोष हरकळ याच्याकडील तपासात कलीम खानसह इतर पाच आरोपींनी ६५० अपात्र विद्यार्थ्यांची यादी व त्यांचे पैसे हरकळ याला दिले आहेत. गुन्ह्याच्या तपासासाठी आरोपीच्या पोलिस कोठडीत वाढ करण्याची मागणी सरकारी वकील विजयसिंह जाधव यांनी केली.