पुणे, ता. ७ : राज्यात तुरळक भागात पावसाच्या सरी तर काही ठिकाणी गारपीटांचा पाऊस होत आहे. अशात उत्तर महाराष्ट्रात उन्हाच्या झळा कायम आहेत. सध्या उष्णतेची लाट काहीशी ओसरत असली तरी उन्हाचा कडाका कायम राहणार आहे. तर शुक्रवारी (ता. ८) मध्‍य महाराष्ट्र, कोकण आणि विदर्भात तुरळक ठिकाणी मेघगर्जनेसह पावसाची शक्यता हवामानशास्त्र विभागाने वर्तवली आहे.
राज्यात गुरुवारी सकाळपर्यंतच्या २४ तासांमध्ये दक्षिण मध्य महाराष्ट्र व दक्षिण कोकणात तुरळक ठिकाणी विजांच्या कडकडाटासह गारांचा पाऊस पडला. तर सर्वाधिक कमाल तापमान अकोला येथे ४३.९ अंश सेल्सिअस तर नीचांकी तापमान महाबळेश्‍वर येथे १९.९ अंश सेल्सिअस नोंदले जात आहे. राज्यात कमाल तापमानासह किमान तापमानात ही वाढ होऊ लागली आहे. बहुतांश ठिकाणी किमान तापमानात सरासरीपेक्षा सुमारे ३ ते ४ अंशांनी वाढ झाली आहे. त्यामुळे उकाडा चांगलाच जाणवू लागला आहे.

विदर्भ, मराठवाडा, कर्नाटक ते तमिळनाडूपर्यंत हवेच्या कमी दाबाचा पट्टा सक्रिय आहे. त्यामुळे कोकण आणि दक्षिण मध्य महाराष्ट्रात वादळी पाऊस पडत आहे. तसेच पुढील दोन दिवस कोकणात तर शुक्रवारी (ता. ८) कोकणासह विदर्भ आणि मराठवाड्यात पावसाचा अंदाज आहे. रविवारपासून (ता. १०) विदर्भात उष्ण लाटेचा इशारा देण्यात आला आहे.

मार्च ठरला सर्वाधिक उष्ण
यंदाच्या हंगामात मार्च महिना उष्ण ठरला आहे. १९०१ ते २०२२ ची स्थिती पाहता यंदा मार्च महिन्यात कमाल तापमान सरासरीपेक्षा १.८६ अंशांनी जास्त नोंदला गेला. त्यामुळे मार्च महिना देशासाठी ‘ताप’दायक होता. दरम्यान आता एप्रिल महिन्यात ही सध्या तापमानात वाढ पाहायला मिळत आहे.