छत्रपती संभाजीनगर, ता. ४ ः पुण्यातील कोथरूड पोलिस ठाण्यात तीन मुलींचा पोलिसांकडून छळ करण्यात आल्याची धक्कादायक माहिती रविवारी (ता. चार) समोर आली होती. या तपास प्रक्रियेत छत्रपती संभाजीनगर पोलिसांनी नियमाप्रमाणेच काम केल्याचा दावा पोलिस दलातील वरिष्ठ अधिकाऱ्याने केला आहे.
पोलिसांनी कोथरूड येथून तीन तरुणींना ताब्यात घेतले होते. मात्र, पोलिसांनी जातिवाचक, अपमानजनक दमदाटी केल्याचा आरोप तरुणींनी केला होता. याचा व्हिडिओ व्हायरल झाल्यानंतर राजकारण तापले आहे. यात बेपत्ता झाल्याच्या तक्रारीवरून छत्रपती संभाजीनगर येथील पोलिस पुण्यात आले होते. मुलींना ताब्यात घेतल्यानंतर पोलिसांनी शिवीगाळ केल्याचा आरोप आहे. परंतु, या प्रकरणात एका मुलीसंदर्भात १९ जुलैला मिसिंग दाखल करण्यात आली होती. नियमानुसार डायरीत नोंद करून पोलिस तपासासाठी गेले होते. यानंतर पोलिस जिथे जिथे तपासासाठी गेले, तेथील पोलिस ठाण्याला याबाबत कल्पना दिली होती. तेथेही ‘वन स्टॉप’च्या केंद्र प्रमुख सविता भोरे यांना कागदपत्रे दिली. त्यानंतरच तिला भेटले. पोलिसांनी यात कुठेही नियम डावलले नसल्याचे वरिष्ठ अधिकाऱ्यांनी स्पष्ट केले आहे.