आळेफाटा, ता. ९ : पुणे-नाशिक राष्ट्रीय महामार्गावर आळेफाटा ते बोटा दरम्यान सुरू असलेल्या सिमेंट काँक्रिटीकरणामुळे शनिवारी पहाटेपासून भीषण वाहतूक कोंडी झाली. शनिवार (ता. ९) , रविवार (ता. १०) सुट्ट्यांमुळे पर्यटकांचा ओघ वाढल्याने महामार्गावर ४ ते ५ किलोमीटरपर्यंत वाहनांच्या रांगा लागल्या असून प्रवाशांचे अतोनात हाल होत आहेत.
महामार्गावर एका बाजूचे काम सुरू असल्याने वाहतूक केवळ एकाच लेनमधून सुरू आहे. शनिवारी (ता. ९) पहाटे पाचपासूनच वाहनांची संख्या वाढल्याने सकाळी सहापर्यंत संपूर्ण रस्ता ठप्प झाला. पुणे-मुंबईकडून नाशिक आणि शिर्डीकडे जाणाऱ्या पर्यटकांना उन्हाच्या तडाख्यात तासनतास एकाच ठिकाणी अडकून पडावे लागले. लहान मुले, महिला आणि ज्येष्ठ नागरिकांना पाणी व अन्नासाठी संघर्ष करावा लागत आहे.
मुख्य रस्त्यावरील कोंडी टाळण्यासाठी वाहनचालकांनी म्हसवंडी-पिंपरी पेंढार या अंतर्गत मार्गांचा अवलंब केला. मात्र, अरुंद रस्त्यांमुळे हे ग्रामीण मार्गही ठप्प झाले आहेत. प्रशासनाने किंवा ठेकेदाराने सुट्ट्यांच्या काळात वाहतुकीचे योग्य नियोजन न केल्याने प्रवाशांमधून तीव्र संताप व्यक्त होत आहे. सध्या आळेफाटा आणि घारगाव पोलिस वाहतूक सुरळीत करण्यासाठी प्रयत्न करत आहेत.