भोर, ता. ३० ः तालुक्यातील दोन मुलींची महाराष्ट्र राज्याच्या १५ वर्षाखालील क्रिकेट संघात निवड झाली. भोर शहरातील श्रावणी रावळ आणि अंबाडे (ता. भोर) येथील स्वरा गाडे (गुरव) या दोघींची महाराष्ट्राच्या क्रिकेट संघात निवड झाली आहे. भारतीय क्रिकेट नियामक मंडळाच्या मुलींच्या १५ वर्षाखालील संघाचे सामने केरळ येथे होणार आहेत. यामध्ये सर्व राज्याचे क्रिकेट संघ सहभागी होणार आहेत.
या सामन्यासाठी महाराष्ट्र क्रिकेट मंडळ यांचा महाराष्ट्र संघ सहभागी होत आहे. हा संघ निवडताना प्रथम साखळी सामने खेळविण्यात आले. सर्व सामने झाल्यावर त्यामधून महाराष्ट्राचा संघ तयार केला गेला. यामध्ये राज्यभरातून सहभागी झालेल्या सुमारे ५० संघांच्या ७५० खेळाडूंमधून श्रावणी व स्वरा यांची निवड झाली. या दोघीही चार वर्षांपासून क्रिकेटची प्रॅक्टीस करत आहेत. त्यांना भोरमधील तारू क्रिकेट अॅकॅडमीचे विश्वजीत तारू, पुणे येथील ब्रिलियंट क्रिकेट ॲकॅडमीचे नितीन सामल आणि खेड शिवापूर येथील पद्मश्री अजित वाडेकर क्रिकेट अॅकॅडमीचे राजू मुजावर यांनी मार्गदर्शन केले. श्रावणी ही भोरमधील राजगड ज्ञानपीठाच्या जिजामाता इंग्लिश मीडियम स्कूलमध्ये इयत्ता आठवीच्या वर्गात शिक्षण घेत आहे. तर स्वरा जिल्हा परिषद प्राथमिक शाळा देगाव येथे इयत्ता सातवीच्या वर्गात शिक्षण घेत आहे. एक वर्षापूर्वी स्वराच्या वडिलांचे निधन झाले असून तिने काकांकडे राहून हे यश मिळविले आहे. श्रावणीचे वडील हे खासगी कंपनीत कामगार म्हणून काम करीत आहे. दोन्ही मुलींसोबत त्यांच्या आई-वडिलांनी मुलींसाठी विशेष कष्ट घेतले आहेत. राजगड ज्ञानपीठचे अध्यक्ष माजी आमदार संग्राम थोपटे, सचिव स्वरूपा थोपटे, जिजामाता इंग्लिश मीडियम स्कूलच्या मुख्याध्यापिका रुबिना शेख, पंचायत समितीचे गटशिक्षणाधिकारी राजकुमार बामणे, देगाव शाळेतील शिक्षक महेंद्र सावंत यांच्यासह अनेक मान्यवरांनी श्रावणी व स्वराचे अभिनंदन केले.
मुलींनी अहोरात्र घेतलेले कष्ट आणि त्यांना प्रशिक्षकांनी केलेले मार्गदर्शन यामुळे हे यश मिळाले आहे. मुलींच्या या यशाचा आम्हाला अभिमान आहे, असे श्रावणीचे वडील राजेंद्र रावळ म्हणाले.