समाजविघातक कृत्य, अतिक्रमणे
चालणार नाहीत : आमदार शिरोळे
शिवाजीनगर, ता. १८ : नामदार गोपाळ कृष्ण गोखले रस्त्यावरील अतिक्रमणे आणि समाजविघातक कृत्यांना चिथावणी देणाऱ्या घडामोडी खपवून घेतल्या जाणार नाहीत, असा इशारा आमदार सिध्दार्थ शिरोळे यांनी दिला. पुणे महापालिकेचा अतिक्रमण विभाग, बांधकाम विभाग आणि वाहतूक पोलिस यांच्या समवेत शिरोळे यांनी या रस्त्यावर पहाणी केली. त्यांनी व्यापाऱ्यांशीही संवाद साधून त्यांच्या समस्या समजावून घेतल्या. हा रस्ता गजबजलेला तसेच रहदारीचा आहे. अतिक्रमणांबाबत महापालिकेने नुकतीच कारवाईही केली आहे. येथे अतिक्रमणांना आता थारा दिला जाणार नाही. शिवाय येथे समाजविघातक कृत्यांना चिथावणी दिली जात असल्याच्या तक्रारी आहेत. हे प्रकार तसेच अतिक्रमण रोखण्यासाठी प्रशासनाने कडक भूमिका घ्यावी, अशी सूचना शिरोळे यांनी दिली.
-----