शिवाजीनगर, ता. २५ : ‘‘संगीत म्हणजे आनंदाचा एक मेळा. कोणतेही संगीत ऐकल्यावर आपल्या मनावर त्याचा परिणाम होतो. एक नवचैतन्य निर्माण होते. गाण्याचा छंद जोपासून अनेकांनी राष्ट्रीय स्पर्धांमध्ये ठसा उमटविला आहे. पुणेकरांच्या गायनाच्या छंदाला गेली २३ वर्षे सोमेश्वर फाउंडेशन प्रेरणा देत आहे, याबद्दल समाधान आहे,’’ अशी भावना राज्याचे कृषीमंत्री माणिकराव कोकाटे यांनी व्यक्त केली.
स्व. आमदार विनायक निम्हण यांनी गायकांना प्रोत्साहन देण्यासाठी सोमेश्वर फाउंडेशनतर्फे ‘पुणे आयडॉल स्पर्धा’ सुरू केली होती. यंदा या स्पर्धेची महाअंतिम फेरी शनिवार पार पडली. याप्रसंगी कोकाटे बोलत होते. यावेळी राज्याचे उच्च व तंत्रशिक्षण मंत्री चंद्रकांत पाटील, भाजपचे शहाराध्यक्ष धीरज घाटे, संयोजक सनी निम्हण उपस्थित होते.
पुणे आयडॉल स्पर्धेच्या निमित्ताने दरवर्षी विविध क्षेत्रांत कार्यरत असलेल्या व गायन कला जोपासणाऱ्या व्यक्तींचा ‘व्हाइस ऑफ चॉईस’ पुरस्काराने सन्मान करण्यात येतो. यंदा डॉ. विनय थोरात, शिवानी पांढरे, नीलेश निकम, अॅड. शीतल कुलकर्णी यांना मान्यवरांच्या हस्ते सन्मानित करण्यात आले.
चंद्रकांत पाटील म्हणाले, ‘‘एखादा उपक्रम सुरु करणे सोपे असते. मात्र तो सातत्याने सुरू ठेवणे कठीण आहे. या स्पर्धेत पुणे शहराव्यतिरिक्त राज्यातून स्पर्धक आले आहेत, हेच या स्पर्धेचे यश आहे.’’
अमित मुरकुटे, हेमंत कांबळे, अनिकेत कपोते, वनमाला कांबळे, संजय माजिरे, गणेश शेलार, संजय तरडे यांनी स्पर्धेसाठी परिश्रम घेतले. परीक्षण ज्येष्ठ गायक राजेश दातार, गायक जितेंद्र भुरुक आणि मंजुश्री ओक यांनी केले. सूत्रसंचालन मिलिंद कुलकर्णी आणि महेश गायकवाड यांनी केले तर उमेश वाघ यांनी आभार मानले.

पुणे आयडॉलचे विजेते
लिट्ल चॅम्प : भार्गव जाधव व परी तेलंग. युवा आयडॉल : अभितांश श्रीवास्तव व नीव कनानी. जनरल आयडॉल : पियुष भोंडे व निखिल गर्गे. ओल्ड इज गोल्ड : सुनील यादव व मनोज मोरे.