समाधान काटे

शिवाजीनगर, ता. १० : पुण्यात गेल्या दीड वर्षात तब्बल चाळीस हजारांहून अधिक नागरिकांवर मोकाट कुत्र्यांनी हल्ला करून चावा घेतल्याची धक्कादायक माहिती महापालिकेकडून मिळाली आहे. क्यूआयकोड सोल्यूशन्स या संस्थेने २०२३ मध्ये केलेल्या सर्वेक्षणानुसार शहरात तब्बल एक लाख ७९ हजार ९४० भटके व मोकाट कुत्री आहेत.
या कुत्र्यांच्या वाढत्या दहशतीमुळे लहान मुले, महिला व ज्येष्ठ नागरिकांना अनेक ठिकाणी जाणे-येणे धोकादायक झाले आहे. मागील दोन महिन्यांत जनवाडी येथील अभिमान मित्र मंडळाजवळ जवळपास पंधरा नागरिकांना कुत्र्यांनी चावा घेतल्याची माहिती स्थानिक रहिवासी अनिता पवार यांनी दिली. मे महिन्यात मॉडेल कॉलनी परिसरात सात वर्षांच्या मुलाचा जबडा कुत्र्याने फाडला होता.
शहरातील विविध चौकात व रस्त्यांवर मोकाट कुत्री टोळक्याने फिरताना दिसतात. ते नागरिकांवर हल्ला करतात, तसेच दुचाकी व चारचाकी वाहनांच्या मागे धावतात. त्यामुळे सर्व मोकाट कुत्र्यांचा बंदोबस्त करावा, अशी मागणी नागरिकांकडून होत आहे.

श्‍वानदंश नागरिकांची संख्या
२०२४ : २५,८९१
२०२५ (जुलैपर्यंत) : १७,०१४

नसबंदी व लसीकरण मोहीम
२०२४-२५ : ५६,५३७

कुत्र्यांची उत्पत्ती कमी करण्यासाठी विशेष मोहीम हाती घेतली आहे. तसेच लसीकरण करून पुणे शहर रेबीजमुक्त करण्यासाठी सातत्याने मोहीम राबवली जात आहे.
- डॉ. सारिका फुंडे, मुख्य पशुवैद्यकीय अधिकारी, महापालिका

मागील आठवड्यात जनवाडी बसथांब्याजवळून जाताना कुत्र्याने माझ्यावर हल्ला केला. त्यात नखाने ओरखडे व चावा घेतला. सरकारी दवाखान्यात तीन इंजेक्शन घेतली असून, अजून दोन बाकी आहेत. मोकाट कुत्र्यांना असे रस्त्यावर सोडण्याऐवजी कोठडीत ठेवावे. याच भागातील आठ वर्षांच्या मुलीलादेखील कुत्र्याने चावा घेतला होता.
- रघुनाथ भोसले, रहिवासी जनवाडी