हुसेनपूर सोसायटीचे काम विकासाभिमुख

प्रदीप विधाते; संस्थेच्या नूतन नोंदणीपत्र, शेतकऱ्यांकडून आनंदोत्सव

खटाव, ता. २९ : बळिराजासाठी माईलस्टोन ठरणाऱ्या पिंपळेश्वर विविध कार्यकारी सहकारी सेवा सोसायटी, हुसेनपूर या संस्थेच्या माध्यमातून खटाव परिसरातील शेतकऱ्यांची उन्नती साधण्याला प्राधान्य देणार आहोत. सातारा जिल्हा बॅंकेच्या ध्येयधोरणाप्रमाणे या सोसायटीची वाटचाल शेतकरी विकासाभिमुख राहील, अशी ग्वाही जिल्हा बॅंकेचे संचालक प्रदीप विधाते यांनी दिली.
हुसेनपूर (खटाव) येथील नूतन विकास सोसायटीचे नोंदणीपत्र स्वीकारताना ते बोलत होते. या वेळी सहाय्यक निबंधक दाजी खताळ, स्वप्नील माळी, रसुलभाई मुल्ला, बबनराव घाडगे, किशोर डंगारे, विजय बोबडे, दिलीप जाधव, एकनाथ चव्हाण, राजेंद्र कुंभार, गणेश शेडगे उपस्थित होते.
श्री. विधाते म्हणाले, ‘‘खटावमधील शेतकऱ्यांच्या आर्थिक उन्नतीसाठी आम्ही नेहमीच प्रयत्नशील राहिलो आहे. जिल्हा बॅंकेच्या शेतकरी हिताच्या विविध योजना राबविण्याला प्राधान्य देत आलो आहोत. आता खटाव आणि हुसेनपूर परिसरातील शेतकऱ्यांसाठी मैलाचा दगड ठरणाऱ्या नूतन सोसायटीच्या माध्यमातून आम्हाला आणखी शेतकरी विकासाभिमुख योजना राबवता येणार आहेत.’’
जिल्हा बॅंकेच्या विविध योजना शेतकऱ्यांपर्यंत पोहचविता येणार आहेत. एआयसारखे अत्याधुनिक तंत्रज्ञान वापरून शेती करण्याला आम्ही प्रोत्साहन देणार आहोत, असेही त्यांनी सांगितले. पिंपळेश्वर विकास सोसायटीला नोंदणीपत्र मिळाल्यानंतर खटावमधील शेतकऱ्यांनी आनंदोत्सव साजरा केला.

-----------------------------------

01306
हुसेनपूर : पिंपळेश्वर विकास सोसायटीचे नोंदणीपत्र स्वीकारताना प्रदीप विधाते आणि सहकारी पदाधिकारी.

-------------------------------