कुरकुंभ, ता. २८ : माळवाडी (ता. दौंड) येथे पुणे जिल्हा परिषदेच्या यशवंतराव चव्हाण कला, क्रीडा व सांस्कृतिक महोत्सवांतर्गत दौंड तालुक्यातील शालेय क्रीडा स्पर्धा कै. भाऊसाहेब भागवत माध्यमिक विद्यालयात उत्साहात पार पडल्या. या स्पर्धांमध्ये जिल्हा परिषद प्राथमिक शाळा, पांढरेवाडी यांनी विविध क्रीडा प्रकारांत उल्लेखनीय कामगिरी करत घवघवीत यश संपादन केले.
वैयक्तिक स्पर्धेत अक्षरा विलास जगताप हिने बेडूक उडी स्पर्धेत प्रथम क्रमांक पटकाविला. संघ स्पर्धांमध्ये लहान गटातील मुलांच्या खो-खो स्पर्धेत पांढरेवाडी शाळेच्या संघाने अंतिम सामन्यात विजय मिळवत विजेतेपद पटकावले असून जिल्हा स्तरावरील स्पर्धेसाठी आपला प्रवेश निश्चित केला आहे.
याशिवाय, ५ वी ते ७ वी गटातील मुलींच्या लंगडी स्पर्धेत शाळेने उपविजेतेपद मिळविले, तर ५ वी ते ८ वी गटातील मुलांच्या खो-खो स्पर्धेत तृतीय क्रमांक पटकावला.
या यशस्वी खेळाडूंना शाळेतील शिक्षक अविनाश अडसूळ, छाया साळवे-पगारे, उज्ज्वला जगताप, ऊर्मिला गुजर, महेंद्र भोसले तसेच मुख्याध्यापक नवनाथ बोंगाळे यांचे मार्गदर्शन लाभले.