लोहगाव, ता. १७ : येथील डी. वाय. पाटील रस्त्यावर डंपरला धडक बसल्याने २२ वर्षीय तरुणाचा जागीच मृत्यू झाला. सोमवारी (ता. १६) दुपारी बारा वाजण्याच्या सुमारास ही दुर्घटना घडली. स्वप्नील प्रकाश साळवे (वय २२) असे मृताचे नाव आहे.
याबाबत विमानतळ पोलिसांनी दिलेल्या माहितीनुसार, स्वप्नील डुडूळगावमधील महाविद्यालयात तास संपवून दुचाकीवरून केसनंदकडे जात होता. त्यावेळी समोरून येणारा डंपरला तो धडकला. मागील चाकाखाली सापडल्याने तो मृत्यूमुखी पडला. विमानतळ पोलिसांनी याप्रकरणी डंपरचालक व्यंकट गुरप्पा पवार (रा. निरगुडी रस्ता, लोहगाव) याला ताब्यात घेतले आहे.
स्वप्नील मुळचा यवतचा (ता. दौंड) रहिवासी आहे. तो बी. फार्मचे शिक्षण घेत होता. केसनंदमध्ये तो मित्रांसोबत राहत होता. तो एका मेडीकल दुकानात कामही करायचा. त्याच्या पश्चात आई, वडील व मोठा भाऊ आहे.
---
डी. वाय. पाटील रस्ता खराब झाला आहे. त्यामुळे तेथे अपघातांचे प्रमाण जास्त आहे. याबाबत पुणे महापालिका प्रशासनाकडे अनेकदा तक्रार करूनही काही फरक पडत नाही. रस्त्याचे काम लवकरच करू असे सांगून अधिकारी चालढकल करतात.
- शंकर किरडे, नागरिक
----