चाकण, ता. १० ः माझ्या गावातील गट नं. ६५७ ही जमीन १९६७-६८ पासून आमच्या वाडवडिलांकडे दरसाल लागवडीस होती. माझे बंधू कै. बाबासाहेब आढळराव पाटील व लांडेवाडी गावचे मेजर आनंदराव शेवाळे हे भारतीय सैन्य दलात सेवेत होते. त्यांनी देशसेवा करून सेवानिवृत्त झाल्यानंतर भूमिहीन म्हणून त्यांना ही जमीन शासनाकडून १९७९ मध्ये रीतसर शासकीय नियमानुसार शेतीप्रयोजनासाठी प्रदान करण्यात आली आहे. या जमिनीच्या मालकीबद्दल आजपर्यंत कुठल्याही न्यायालयात किंवा महसूल विभागात दावा व वादविवाद गेल्या ५० वर्षांत झालेला नाही. त्यामुळे काही अधर्वटरावांकडून चुकीची माहिती गोळा करून अमोल कोल्हे यांनी देशाची सेवा करणाऱ्या सैनिकांचा अपमान केला आहे. याबद्दल त्यांचा मी जाहीर निषेध करतो, असे स्पष्टीकरण शिवाजीराव आढळराव पाटील यांनी कोल्हेंच्या आरोपांवर दिले आहे.