मंचर, ता. ९ : “आंबेगाव तालुक्यातील खेळाडूंना अद्ययावत सुविधा देण्यासाठी मंचर येथील तालुका क्रीडा संकुलातील विकासकामे तातडीने पूर्ण करा. यासाठी उपलब्ध तीन कोटी रुपयांचा निधी जलदगतीने खर्च करावा,” अशा सूचना माजी गृहमंत्री तथा आमदार दिलीप वळसे पाटील यांनी दिल्या.
मंचर येथील तालुका क्रीडा संकुल समितीची बैठक वळसे पाटील यांच्या अध्यक्षतेखाली पार पडली. यावेळी जिल्हा क्रीडा अधिकारी जगन्नाथ लकडे, तालुका क्रीडा अधिकारी शोभा पालवे, उपनगराध्यक्ष लक्ष्मण थोरात, अजय घुले, ॲड. राहुल पडवळ, उपअभियंता सूर्यकांत कुंभार उपस्थित होते. वळसे पाटील म्हणाले, “२१ एकर क्षेत्रावरील हे राज्यातील मोठ्या संकुलांपैकी एक आहे. येथे ४०० मीटर धावणे मार्ग, कबड्डी मैदान, बॅडमिंटन हॉलचे नूतनीकरण, लाकडी कोर्ट दुरुस्ती आणि सीसीटीव्ही यंत्रणा बसवण्याची कामे प्राधान्याने करावीत.”