नवी दिल्ली, ता. १९ ः या आठवड्याच्या अखेरीस पाकिस्तानमध्ये होणाऱ्या अंधांच्या टी-२० विश्वकरंडक क्रिकेट स्पर्धेसाठी पाकमध्ये जाण्यास भारतीय संघाला सुरक्षिततेच्या कारणामुळे सरकारने परवानगी नाकारली आहे.
केंद्र सरकारच्या या निर्णयामुळे चॅम्पियन्स करंडक स्पर्धेसाठीही रोहित शर्माच्या संघाला कोणत्याही परिस्थितीत केंद्र सरकार परवीनही देणार नाही, हे निश्चित झाले आहे. पाकिस्तानमधील अंधांची टी-२० विश्वकरंडक स्पर्धा २३ नोव्हेंबर ते ३ डिसेंबरदरम्यान होणार आहे आणि त्यासाठी भारतीय संघ उद्या पाकिस्तानमध्ये जाणार होता. वास्तविक क्रीडा मंत्रालयाने भारतीय संघाला पाकिस्तानमध्ये जाण्यास हिरवा कंदील दाखवला होता, परंतु सरकारने आज परवानगी नाकारली. आम्ही उद्या पाकिस्तानसाठी रवाना होणार होता, परंतु सरकारने परवानगी नाकारल्याचे सांगण्यात आले, अशी माहिती भारतीय दृष्टिहीन क्रिकेट संघटनेचे सरचिटणीस शैलेंद्र यादव यांनी दिली. सरकारचा निर्णय आम्हाला मान्य आहे, परंतु हा निर्णय ते अगोदरही घेऊ शकले असते. अखेरच्या क्षणापर्यंत आम्हाला वाट पाहायला का लावली, असाही प्रश्न शैलेंद्र यादव यांनी उपस्थित केला.