संक्षिप्त ‘सुकी’ भरल्याने सिंचनालाही लाभ जळगाव : सुकी धरण शंभर टक्के भरल्याने फैजपूर शहरातील पाणीटंचाई दूर झाली असून, परिसरातील सिंचनासाठीदेखील लाभ होणार आहे. गारबर्डी येथील सुकी धरणातून लोहारा येथून उपसा करून शहरातील खिरोदा रस्त्यावरील पुरवठा योजनेच्या ठिकाणी हे पाणी आणण्यात आले आहे. गेल्या तीन वर्षांच्या तुलनेत यंदाच्या जून महिन्यात सुकी धरणाच्या जलसाठ्याच्या टक्केवारीत घट झाली होती. यंदा जून महिन्यात पाऊस लांबल्याने पाणीसाठ्याचे प्रमाण कमी होण्याची चिन्हे दिसत होती. मात्र, गेल्या पंधरवड्यात सातपुडा पर्वतरांगांत झालेल्या दमदार पावसामुळे सुकी धरणाच्या जलपातळीत वाढ होऊन अखेर धरण पूर्णक्षमतेने भरले. ज्यामुळे शहरासाठी पुरेसा व मुबलक पाणीपुरवठा करणे सोयीचे होणार आहे.