कोथरूड, ता. ७ : एकादशीचा सण आनंदाने साजरा करण्यासाठी मंदिरापुढील अंगणात मांडव टाकला, पण सांडपाण्यामुळे सर्वांच्या उत्साहावर पाणी पडले. सांडपाण्याची वाहिनी दुरुस्ती करून तातडीने रस्ता स्वच्छ करावा, अशी मागणी येथील रहिवाशांनी केली आहे.
लक्ष्मीनगर वसाहतीचे पुनर्वसन होणार आहे. त्यामुळे येथे असलेली वस्ती हलविणार आहेत. त्यामुळे येथील नादुरुस्त सांडपाण्याची वाहिनी दुरुस्त केली जात नाही. वरून येणारे सांडपाणी विजय त्रिमूर्ती मित्र मंडळ, साईनाथ मित्र मंडळ, कैलास मंदिरापर्यंत वाहत जाते. त्याचा त्रास येथील रहिवाशांना होत आहे. वाहिनी बदलणे शक्य होत नसेल तर किमान नियमित सफाई तरी करावी, अशी मागणी येथील रहिवासी करत आहेत.
कैलास मोहोळ म्हणाले की, सणामुळे व इतर दिवशीही लोक मंदिरात येत असतात. परंतु दोन महिने येथील रस्त्यावर सांडपाणी वाहत आहे. महापालिकेचे अधिकारी येऊन तात्पुरती दुरुस्ती करतात पण प्रश्‍न सुटलेला नाही. दरवर्षी आम्ही साजरा करत असलेला गुरुपौर्णिमेचा उत्सव कसा साजरा करायचा? असा प्रश्‍न आम्हाला पडला आहे. वारंवार अर्ज करूनही उपयोग झालेला नाही.
सचिन पवार म्हणाले की, गुरुपौर्णिमेच्या उत्सव काळात येथे रस्त्यावर पाणी वाहणार नाही व रस्ता स्वच्छ राहावा म्हणून महापालिकेने उपाय योजना करावी. कोथरूड क्षेत्रीय कार्यालयाचे सहाय्यक आयुक्त विजय नायकल म्हणाले की, साईनाथ वसाहतीमधील ड्रेनेज वाहिनी साफ करण्यासाठी वारंवार मशिन पाठविण्यात येते. या भागातील काही लोक ड्रेनेजमध्ये कचरा टाकत असल्याने वाहिनी तुंबण्याचे प्रकार वाढले आहेत. येथे कारवाईचे प्रमाण वाढविले आहे. नागरिकांनी जबाबदारीने कचरा संकलन व वर्गीकरणासाठी सहकार्य करावे. ड्रेनेज वाहिनीत कचरा टाकू नये.