कोथरूड, ता. १८ : श्रीमती रत्नप्रभादेवी मोहिते पाटील प्राथमिक शाळा कोथरूड येथे विद्यार्थ्यांसाठी पहिल्यांदाच मोबाईल अॅपच्या साहाय्याने ईव्हीएम मशिनद्वारे मतदान प्रक्रिया राबविण्यात आली. विद्यार्थ्यांना लोकशाही प्रक्रियेची जाणीव व्हावी व प्रत्यक्ष मतदानाचा अनुभव यावा, या उद्देशाने हा अभिनव उपक्रम शनिवारी यशस्वीपणे पार पडला.
विशेष म्हणजे इयत्ता पहिली ते सातवीच्या सर्व विद्यार्थ्यांनी मतदार म्हणून सहभाग घेतला. त्यांच्यासाठी मतदार यादी तयार केली होती. ठरवलेल्या वेळेनुसार सर्व विद्यार्थ्यांनी रांगेत उभे राहत मोबाईल अॅपमधील ईव्हीएम मशिनद्वारे आपला मतदानाचा हक्क बजावला. या प्रक्रियेमुळे सर्व वयोगटातील विद्यार्थ्यांमध्ये लोकशाही मूल्यांची बीजे पेरली गेली. या उपक्रमामुळे सातवीच्या विद्यार्थ्यांना प्रत्यक्ष निवडणूक प्रक्रियेबाबत कृतिशील अनुभव मिळाला. या शालेय निवडणुकीत विविध पदांसाठी विद्यार्थ्यांनी उमेदवारी अर्ज भरले, प्रचार केला आणि निवडणूकही झाली.
या उपक्रमासाठी मुख्याध्यापिका लाजवंती जाधव यांचे मार्गदर्शन, सहशिक्षक मोहसीन शेख आणि इतर शिक्षक यांच्या प्रयत्नातून पेपरलेस लोकशाही पद्धतीने मतदान निवडणूक प्रक्रिया हसत खेळत वातावरणात पार पडली.