कोथरूड, ता. १६ ः ‘‘आपल्या देशाला २०४७ मध्ये महासत्ता बनवायची आहे. त्यासाठी आपण करत असलेले काम नियमाप्रमाणे करण्याची आणि देशाच्या प्रगतीसाठी करण्याची भावना मनात बाळगली पाहिजे. स्वातंत्र्याबरोबर आलेल्या जबाबदारीचे भान ठेवा.’’ असा सल्ला माजी लष्करप्रमुख मनोज नरवणे यांनी दिला.
संस्कृती प्रतिष्ठानतर्फे गुणवंत विद्यार्थी गौरव समारंभ कोथरूडमधील यशवंतराव चव्हाण नाट्यगृहात रविवारी सकाळी आयोजित करण्यात आला होता. त्यावेळी नरवणे बोलत होते. याप्रसंगी केंद्रीय नागरी विमान वाहतूक व सहकार राज्यमंत्री मुरलीधर मोहोळ, क्रिकेटपटू केदार जाधव, पुणे श्रमिक पत्रकार संघाचे अध्यक्ष ब्रिजमोहन पाटील, अभिनेते-दिग्दर्शक प्रवीण तरडे आदी उपस्थित होते. यावेळी सातशे गुणवंत विद्यार्थ्यांना गौरविण्यात आले. समारंभाचे हे २३ वे वर्षे होते. स्वामी विवेकानंद आणि पंतप्रधान मोदी यांच्यावरील पुस्तक, शैक्षणिक साहित्य आणि सन्मानचिन्ह असे पुरस्काराचे स्वरूप होते.
मोहोळ म्हणाले, ‘‘आपल्या तरुणांचे भवितव्य उज्ज्वल आहे. हीच तरुण पिढी भारताला पुढे नेईल. गुणवंत विद्यार्थी हे प्रतिभावंत कसे होतील, हा प्रयत्न आहे. पंतप्रधान नरेंद्र मोदी यांचे देशाला सर्वोच्च स्थानी पोहचविण्याचे स्वप्न आपण सर्व मिळून पूर्ण करू.’’
माजी नगरसेविका व संस्कृती प्रतिष्ठानच्या अध्यक्षा मोनिका मोहोळ, हर्षाली माथवड, वासंती जाधव आदी व्यासपीठावर उपस्थित होते. मिलिंद कुलकर्णी यांनी सूत्रसंचालन केले. हर्षल दारकुंडे यांनी गुणवंत विद्यार्थी सत्कार कार्यक्रमाचे सूत्रसंचालन केले.

फोटो ः 13094