धनकवडी, ता. २८ : येथील श्री सद्‍गुरू संतवर्य योगिराज शंकर महाराज समाधी ट्रस्टतर्फे श्री सद्‍गुरू शंकर महाराज यांचा ७६ व्या समाधी सोहळ्यानिमित्त वैविध्यपूर्ण कार्यक्रमांचे आयोजन करण्यात आले. या वेळी दर्शनासाठी मोठी गर्दी झाली होती. मठामध्ये यानिमित्ताने खास फुलांची सजावट तसेच विद्युत रोषणाई केली होती. यानिमित्त केंद्र सरकारच्या टपाल विभागाकडून श्री सद्‍गुरू शंकर महाराजांचे प्रकाशचित्र असलेल्या टपाल पाकीटाचे अनावरण खासदार श्रीनिवास पाटील यांच्या हस्ते झाले. या वेळी टपाल विभागाच्या पुणे विभागाचे जनरल पोस्टमास्टर आर. के. जायभाय आणि रिपन ड्यूलेट उपस्थित होते. तसेच महाराजांच्या जीवनावरील माहिती पत्रकाचे अनावरण पाटील यांनी केले. या वेळी डॉ. सचिन पुणेकर, माजी आमदार उल्हास पवार, आमदार भीमराव तापकीर, माधुरी मिसाळ, सुनील कांबळे, विश्वस्त सुरेंद्र वाईकर, सतीश कोकाटे, डॉ. पी. डी. पाटील आदी उपस्थित होते.,