ग्रीन हिल्स ग्रुपतर्फे
पर्यावरणावर प्रदर्शन
पुणे, ता. १ : ग्रीन हिल्स ग्रुपने जागतिक पर्यावरण दिनानिमित्त तीन दिवसांचे प्रदर्शन आयोजित केले आहे. छायाचित्रकार अतुल वाघ यांनी पर्यावरणावर आधारित काढलेली पोस्टर आणि पेंटिंग्ज प्रदर्शनात मांडण्यात येतील. या प्रदर्शनाच्या माध्यमातून जास्तीत जास्त लोकांपर्यंत पर्यावरण रक्षणाबाबत जनजागृती करणे तसेच त्यांचा सहभाग वाढविणे हा उद्देश आहे.
ग्रीन हिल्स ग्रुपचे अध्यक्ष संजय सूर्यवंशी यांनी पत्रकार परिषदेत ही माहिती दिली. याप्रसंगी नॅशनल सोसायटी फॉर क्लीन सिटी पुणेचे अध्यक्ष शामला देसाई, अतुल वाघ, वन उद्यान संवर्धन व सेवा संस्था वारजेचे कार्याध्यक्ष किशोर मोहोळकर आदी उपस्थित होते. प्रदर्शनाच्या माध्यमातून टेकडी संवर्धन, जनजागृती, पर्यावरण रक्षणाचे उपाय या विषयांवर मार्गदर्शन केले जाणार आहे. त्याचबरोबर पुणे व परिसरातील विविध टेकड्यांवर काम करणाऱ्या संघटना व संस्था यांना एकत्रित करण्यात येणार आहे. तसेच टेकडीच्या संवर्धनासाठी लोकांमध्ये जनजागृती करण्यात येणार आहे असेही यावेळी सूर्यवंशी यांनी सांगितले.
हे प्रदर्शन ४ ते ६ जून दरम्यान बालगंधर्व कलादालन येथे सकाळी नऊ ते रात्री आठ या वेळेत सर्वांसाठी खुले राहणार आहे. प्रदर्शनाचे उद्घाटन रविवारी (ता. ४) सकाळी दहा वाजता होईल. या कार्यक्रमाला पुणे महापालिका अतिरिक्त आयुक्त डॉ. कुणाल खेमनार, पुणे वन विभागाचे उपवनसंरक्षक राहुल पाटील, महापालिकेच्या घनकचरा विभागाच्या आयुक्त आशा राऊत, त्याचबरोबर मॉडर्न कॉलेजच्या संचालक डॉ. ज्योत्स्ना एकबोटे आदी मान्यवर उपस्थित राहणार आहेत.
----