पुणे, ता. ११ : पुणे महापालिकेला कोरोनाच्या काळात अनेक कंपन्यांकडून ‘सीएसआर’च्या माध्यमातून ७ कोटी २२ लाख रुपयांचा निधी उपलब्ध झाला. पण, त्यापैकी केवळ एक कोटी ३० लाख रुपये आतापर्यंत खर्च झाले आहेत. त्याचा वापर केला गेला नसल्याने पुणेकर आरोग्य सुविधांपासून वंचित असल्याचा आरोप सजग नागरिक मंचाने केला आहे.

कोरोनाच्या काळात आरोग्य सुविधा निर्माण करण्यासाठी महापालिकेने मोठ्या प्रमाणात निधी खर्च केला. शहर व जिल्ह्यातील अनेक मोठ्या कंपन्यांकडे मदतीसाठी आवाहन केले होते. त्यास प्रतिसाद देत अनेक कंपन्यांनी वैद्यकीय उपकरणांसह रोख रक्कम महापालिकेला मदत म्हणून दिली. यात २०२०-२१ मध्ये ४ कोटी ८९ लाख, २०२१-२२ मध्ये ३ कोटी १० लाख रुपयांची रोख रक्कम जमा झाली. त्यापैकी १ कोटी ३० लाख रुपये बेड व ऑक्सिजनवर खर्च केले आहेत. बँकेत जमा असलेल्या ७ कोटी २२ लाख रकमेवर ५४ लाख रूपये व्याज मिळाले आहे, असे माहिती अधिकारात मिळालेल्या माहितीत पुढे आले.

आरोग्याअभावी कोरोनाकाळात नागरिकांचे हाल झाले. महापालिकेला दिलेल्या निधीचा योग्य पद्धतीने वापर झाला नाही. बँक खात्यात हा निधी पडून राहिल्याने त्याचा नागरिकांसाठी काहीच उपयोग होत नाही. प्रशासनाने या निधीचा योग्य पद्धतीने वापर करून नागरिकांना आरोग्य सुविधा द्याव्यात.
-विवेक वेलणकर, अध्यक्ष, सजग नागरिक मंच

‘सीएसआर’ निधीचा वापर करण्यासाठी महापालिका आयुक्तांकडे प्रस्ताव ठेवून त्याचा योग्य पद्धतीने वापर करण्यात येईल.
- डॉ. भगवान पवार, आरोग्य प्रमुख, महापालिका