भारत दर्जेदार तंत्रज्ञान बनवू शकतो ः राममूर्ती

पुणे, ता. ८ ः ऊर्जेच्या कमतरतेमुळे युरोपने ऊर्जा बचतीचे, कामगारांच्या अभावामुळे अमेरिकेने स्वयंचलित आणि जागेच्या कमतरतेमुळे जपानने कॉम्पॅक्ट तंत्रज्ञान विकसित केले. त्याचप्रमाणे जगातील सर्वात मोठी लोकसंख्या असलेला भारत किफायतशीर आणि दर्जेदार तंत्रज्ञान बाजारपेठेत आणू शकतो, असा विश्वास व्यवस्थापन शास्त्रातील तज्ज्ञ प्राध्यापक रवी राममूर्ती यांनी व्यक्त केला.
कोथरूड येथील एमआयटी डब्ल्यूपीयू विद्यापीठात आयोजित ‘इनोव्हेशन अॅन्ड लिडरशीप इव्हेंट''मध्ये ते बोलत होते. सकाळ प्रकाशन आणि एमआयटी डब्ल्यूपीयू विद्यापीठाच्या वतीने डी.एस. प्रसन्ना लिखित इनोव्हेटिव्ह लोकली टू वीन'' आणि राममूर्ती लिखित ‘रिव्हर्स इनोव्हेशन इन हेल्थ केअर'' या पुस्तकांचे प्रकाशन करण्यात आले. यावेळी कुलगुरू डॉ. आर.एम. चितळे. क्रस्ना डायग्नॉस्टीक्सचे पल्लवी जैन, गिरीश वरदाडकर, डॉ. मिलिंद पांडे, सकाळ प्रकाशनचे आशुतोष रामगिर उपस्थित होते.
राममूर्ती आणि प्रसन्ना या दोन दिग्गजांनी एकमेकांशी संवाद साधत मनुष्यबळ व्यवस्थापनापासून ते औद्योगिक जगतातील बदलांपर्यंतचा आढावा घेतला. प्रसन्ना यांनी सांगितले की, नवसंशोधन हे भारतात नेहमी ‘मिशन मोड'' मध्येच झाले. डिजिटल तंत्रज्ञानाच्या माध्यमातून आपण अशक्य गोष्टी शक्य करीत आहोत. त्यामुळे येत्या काळात भारतात नक्कीच जग बदलविणारे तंत्रज्ञान विकसित होईल.
उत्पादनातील शेवटच्या टप्प्यात सहभागी होणे म्हणजे ‘मेक इन इंडिया‘ नाही, असे स्पष्ट मत राममूर्ती यांनी व्यक्त केले. ते म्हणाले की, " उत्पादनांच्या जोडणीच्या पलीकडे जात, मूलभूत आणि महत्त्वपूर्ण तंत्रज्ञानाच्या विकासाकडे आपल्याला लक्ष द्यावे लागणार आहे. चीनच्या कंपन्यांनी हे तंत्रज्ञान आत्मसात करून स्वतःला सिद्ध केले. स्थानिक गरजांनुसार तंत्रज्ञान विकसित करण्यासाठी भारताला प्रयत्न करावे लागणार आहे."
क्रस्ना डायग्नॉस्टीक्सच्या माध्यमातून आम्ही दुर्गम आणि वंचित भागात दर्जात्मक आणि अचूक निदान पोचविल्याचे जैन यांनी सांगितले.
---
तज्ज्ञ म्हणाले
- नेतृत्व विकास केवळ ज्ञान आणि कौशल्याशी निगडित नाही तर तो चौकटीबाहेरील संशोधनाचा भाग आहे
- आंतरराष्ट्रीय कंपन्या आता विकसनशील देशांच्या बाजारपेठेकडे आकर्षित झाल्या आहेत
- जगाच्या जीडीपीमध्ये दोन तृतीयांश विकसनशील देशांचा वाटा
- भारतासह बहुतेक विकसनशील देशांत सध्या स्टार्टअप फीवर
-----