पुणे, ता. २८ : कोंढवा खुर्द परिसरात पारगे नगर येथील रस्त्यावरील ‘एमएनजीएल’ गॅसची पाइपलाइन फुटल्याने भीषण आग लागल्याची घटना मंगळवारी दुपारी घडली. या घटनेत कोणी जखमी झाले नसल्याची माहिती अग्निशमन दलाच्या सूत्रांनी दिली.
या रस्त्यावर जेसीबीच्या साह्याने खोदकाम सुरू होते. त्यावेळी ‘एमएनजीएल’ लाईन फुटल्याने मोठ्या प्रमाणात आग लागली. अग्निशामक दलाच्या जवानांनी आगीवर पाण्याचा मारा सुरू ठेवत ‘एमएनजीएल’च्या अधिकाऱ्यांशी नियंत्रण कक्षामार्फत संपर्क साधला. त्यांनी तातडीने घटनास्थळी धाव घेत ‘एमएनजीएल’च्या मुख्य वाहिनीचा प्रवाह बंद केला. अग्निशामक दलाच्या जवानांनी सुमारे तीस मिनिटांत आग आटोक्यात आणली. त्यामुळे पुढील अनर्थ टाळला.
अग्निशामन अधिकारी कैलास शिंदे, वाहनचालक योगेश जगताप, फारुक शेख, अनिल खरात, तांडेल सोपान कांबळे, जवान अभिजित थळकर, अर्जुन यादव, महेश फडतरे, संदीप पवार, अभिषेक कसबे, दिनेश डगळे, प्रसाद शिंदे, संदीप कवडे यांनी आग आटोक्यात आणण्यासाठी प्रयत्न केले.