पुणे : ‘‘आगामी लोकसभा निवडणुकीसाठी राष्ट्रवादी काँग्रेस शरदचंद्र पवार पक्षाच्या उमेदवारांची यादी तयार आहे. परंतू, महाविकास आघाडीतील सर्व घटक पक्षांचे जागावाटप निश्चित होत नाही, तोपर्यंत ही यादी जाहीर केली जाणार नसल्याचे,’’ प्रदेशाध्यक्ष जयंत पाटील यांनी आज (ता.१०) पुणे येथे पत्रकारांशी बोलताना सांगितले.

मांजरी येथील वसंतदादा शुगर इन्स्टिट्यूटमध्ये (व्हीएसआय) संस्थेच्या नियामक मंडळाची बैठक आयोजित करण्यात आली होती. या बैठकीनंतर ते पत्रकारांशी बोलत होते. पाटील म्हणाले, ‘‘राष्ट्रवादी काँग्रेस शरदचंद्र पवार पक्षाच्या उमेदवारांच्या यादीबाबत काहीच अडचण नाही. जागावाटपाबाबत चर्चाही चांगली झाली आहे.

‘वंचित’ने प्रस्ताव घेतला असून, तो त्यांच्या कार्यकारिणीसमोर मांडला आहे. वंचित बहुजन विकास आघाडीचे प्रकाश आंबेडकर हे महाविकास आघाडीसोबत येतील, असा विश्वास आहे. ज्येष्ठ नेते शरद पवार यांनी देशात आणि राज्यात राजकारण केले आहे.

ते नेहमीच जनतेच्या मनातील लोकांना पक्षात घेतात आणि निवडून आणून मोळी बांधतात. ज्यांना मोळी बांधता आली नाही, त्यांच्यावर काय बोलणार,’’ असे म्हणत त्यांनी महाराष्ट्र नवनिर्माण सेनेचे अध्यक्ष राज ठाकरे यांचे नाव न घेता अप्रत्यक्ष टोला लगावला.

जयंत पाटील म्हणाले

- महापालिकेच्या कार्यक्रमात खासदार, आमदारांची नावे असायला हवीत
- पुणे महापालिका आयुक्त हे सरकारची चाकरी करतात. कोण्या पक्षाची नाही
- कोल्हापूर सांगली आणि हातकणंगले या जागांवर चर्चा होऊन, योग्य निर्णय होईल
- आपल्या देशात ‘वन नेशन, वन इलेक्शन’ तसे ‘वन नेशन, एक निवडणूक आयुक्त’ असे असेल
- निवडणूक आयुक्तांनी राजीनामा देण्यामागचे कारण देशासमोर यायला हवे

अजित पवार, वळसे पाटलांची बैठकीला दांडी

दरम्यान, वसंतदादा शुगर इन्स्टिट्यूटच्या (व्हीएसआय) नियामक मंडळाच्या आजच्या बैठकीला उपमुख्यमंत्री अजित पवार, आणि राज्याचे सहकार मंत्री दिलीप वळसे-पाटील यांनी दांडी मारली. अजित पवार हे या संस्थेचे संचालक तर वळसे-पाटील हे उपाध्यक्ष आहेत. आजच्या बैठकीला जयंत पाटील, विजयसिंह मोहिते-पाटील, राजेश टोपे, बबन शिंदे, विशाल पाटील आदी उपस्थित होते.