पुणे, ता. १४ : मार्केट यार्डमधील मुख्य रस्ता असलेल्या नेहरू रस्त्यावर आठ ते दहा चेंबरची झाकणे गायब आहेत. तर काही चेंबरची झाकणे तुटल्याने रस्ता धोकादायक झाला आहे. बिगर झाकणाच्या चेंबरमुळे नागरिकांच्या जीवाला धोका निर्माण झालेला आहे. महापालिकेने त्वरित या ठिकाणची दुरूस्ती करावी, अशी मागणी माजी नगरसेवक प्रवीण चोरबोले यांनी केली आहे.
पाऊस जोरात झाला तर या रस्त्यावर गुडघाभर पाणी जमा होते. पाण्यामुळे नागरिकांना या ठिकाणी असलेले चेंबर दिसत नाहीत. त्यात चेंबरला झाकण नसल्याने त्यात एखादी व्यक्ती अडकून अपघात होऊ शकतो. त्यामुळे महापालिकेने दुर्घटना घडण्यापूर्वीच चेंबरची सर्व झाकणे बदलावीत व रस्ता सुस्थितीत करावा. अन्यथा या विरोधात आंदोलन करण्याचा इशारा चोरबोले यांनी दिला आहे.