पुणे, ता. १५ : देशात उन्हाने होरपळणाऱ्या प्रत्येकाला आणि पावसाकडे डोळे लावून बसलेल्या शेतकऱ्यांसाठी आनंदाची बातमी आहे. नैर्ऋत्य मोसमी पाऊस यंदा एक दिवस आधीच म्हणजे ३१ मे रोजी केरळमध्ये दाखल होणार आहे.
मॉन्सून देशातील पहिली सलामी केरळमध्ये देतो. सामान्यतः १ जूनला केरळमध्ये मॉन्सून बरसतो. यंदा उन्हाच्या त्रासाने हैराण झालेल्या सर्वांसाठी भारतीय हवामान खात्याने एक दिवस आधीच मॉन्सून केरळमध्ये दाखल होणार असल्याचा अंदाज बुधवारी रात्री दिला आहे. येत्या रविवारपर्यंत (ता. १९) मॉन्सून दक्षिण अंदमानच्या किनाऱ्यावर दाखल होईल, असे यापूर्वीच हवामान खात्याने सांगितले होते. त्यापुढे जाऊन हा अंदाज आता जाहीर केला आहे.
भारतीय हवामान खाते २००५ पासून मॉन्सून केरळमध्ये दाखल होण्याची तारीख जाहीर करीत आहे. त्यासाठी सांख्यिकी पद्धतीचे प्रारूप देशात विकसित केले आहे. त्या आधारावर चार दिवस पुढे-मागे मॉन्सून केरळमध्ये दाखल होईल, असे नमूद केले आहे. हा अंदाज वर्तविण्यासाठी वेगवेगळ्या सहा निकषांचा वापर करण्यात येतो.

मॉन्सून केरळमध्ये दाखल झाल्याची तारीख
वर्ष ............. दाखल .............. अंदाज
२०१९ .......... ८ जून ..................... ६ जून
२०२० .......... १ जून ...................... ५ जून
२०२१ .......... ३ जून .................... ३१ मे
२०२२ .......... २९ मे ..................... २७ मे
२०२३ .......... ८ जून ...................... ४ जून