पुणे, ता. १६ : भाजपने राज्यभरातील नवे जिल्हाध्यक्ष व शहराध्यक्ष यांची निवड करून दोन महिने होत आले, पण पक्षाची संघटन रचना पूर्ण होऊ शकली नाही. प्रदेश अध्यक्ष निवडीनंतर आता ही प्रक्रिया सुरू होत असून ३१ जुलैपूर्वी सर्व नियुक्त्या पूर्ण करा आणि स्थानिक स्वराज्य संस्थांच्या निवडणुकीसाठी सज्ज रहा, असा आदेश नवनियुक्त प्रदेशाध्यक्ष रवींद्र चव्हाण यांनी पदाधिकाऱ्यांना दिला.
भाजपची पश्चिम महाराष्ट्र आढावा बैठक आज पुण्यात पार पडली. यावेळी पश्चिम महाराष्ट्रातील सर्व जिल्हाध्यक्ष शहराध्यक्ष प्रदेश पातळीवर पदाधिकारी माजी नगरसेवक जिल्हा परिषद सदस्य आदी उपस्थित होते. माध्यमांशी बोलताना रवींद्र चव्हाण म्हणाले, ‘‘ही संघटनात्मक बैठक आहे. सध्या पक्षाच्या संघटन पर्वाचा अंतिम टप्पा सुरू आहे. नियुक्त्यांची प्रक्रिया महिनाअखेरपर्यंत पूर्ण व्हावी, यासाठी ही बैठक झाली. कुठे अडचणी आहेत का हे जाणून घेतले जात आहे. ही बैठक कोणत्याही निवडणुकीच्या तयारीसाठी नाही.’’
या बैठकीत चव्हाण यांच्या हस्ते मंडल अध्यक्षांना नियुक्तिपत्र व टॅब वितरित केले. संघटनात्मक काम अधिक गतिमान व्हावे यासाठी टॅब देण्यात आले आहेत. पक्षाच्या रचनात्मक बांधणीसाठी नव्या पिढीला जबाबदाऱ्या देण्याचा निर्णय घेतला आहे. या माध्यमातून अधिक जोमाने जनतेशी संपर्क साधा, असे आवाहन चव्हाण यांनी कार्यकर्त्यांना केले.

महत्त्वाचे मुद्दे
- संघटन पर्वाचा अंतिम टप्पा सुरू
- नियुक्त्या महिनाअखेरपर्यंत पूर्ण करण्याचा आदेश
- शहर कार्यालयाला पहिली भेट, शहर पदाधिकाऱ्यांकडून चव्हाण यांचा सत्कार
- मंडल अध्यक्षांना नियुक्तीपत्र व टॅब वाटप
- २२ जुलैला रक्तदान शिबिर आयोजित करण्याचा आदेश