पुणे, ता. २० : राज्य उत्पादन शुल्क विभागाच्या पथकाने अवैध मद्य तस्करी करणाऱ्यांवर कारवाई केली. यामध्ये ३१ लाख ५६ हजार रुपयांचा मुद्देमाल जप्त केला. ही कारवाई पाटस, उरुळी कांचन भागांत करण्यात आली.
संतोष सुनील मारकड (रा. दत्तवाडी, उरुळी कांचन), वैभव शिवाजी तरंगे (व्यंकटेशनगर, ता. हवेली), आकाश बाळासाहेब कोडलिंगे (रा. चंदनवाडी), कुणाल सुनील कोल्हे (रा. नांदूर), बबन देवचंद पावने (रा. मोई, ता. खेड) अशी अटक करण्यात आलेल्या आरोपींची नावे आहेत.
गोवा बनावटीच्या मद्याची वाहतूक होणार असल्याची माहिती राज्य उत्पादन विभागाचे दौंडचे दुय्यम निरीक्षक एम. व्ही. गाडे यांना मिळाली होती. त्यानुसार सापळा रचून इंदापूरहून पुण्याच्या दिशेने जाणाऱ्या संशयित दोन वाहनांची तपासणी केली असता, गोवा बनावटीच्या मद्याचे बॉक्स आढळून आले होते. याप्रकरणी आरोपींना अटक करण्यात आली. आरोपींकडे चौकशी केल्यानंतर राहत्या घरातून गोवा बनावटीचे मद्याचे बॉक्स जप्त करण्यात आले. तसेच चंदनवाडी येथील आणि नांदूर येथील हॉटेलमध्ये छापा टाकला असता, विविध प्रकारच्या गोवा बनावटीचे मद्य जप्त करण्यात आले. याप्रकरणी आकाश कोडलिंगे आणि कुणाल सुनील कोल्हे या आरोपींना अटक करण्यात आली. कोडलिंगे आणि कोल्हे यांच्याकडे करण्यात आलेल्या चौकशीनंतर खेड तालुक्यातील मोई येथील बबन पावने यांच्या चारचाकी वाहनातून विविध प्रकारची गोवा बनावटीचे मद्ये जप्त करण्यात आली. या प्रकरणात महाराष्ट्र दारूबंदी कायदा आणि भारतीय न्याय संहिता अंतर्गत विविध कलमांखाली गुन्हा दाखल करण्यात आला आहे. ही कारवाई राज्य उत्पादन शुल्क पुणे विभागाचे अधीक्षक अतुल कानडे यांच्या मार्गदर्शनाखाली उपअधिक्षक उत्तम शिंदे, निरीक्षक विजय रोकडे, एन. एस. देवणे, शहाजी शिंदे, दुय्यम निरीक्षक एम. व्ही. गाडे, प्रदीप झुंजरूक, डी. आर. ठाकूर, दिनेश सूर्यवंशी, सागर साबळे, विकास थोरात, जवान शुभम भोईटे, डी. जे. साळुंखे, नीलेश पवार, केशव वामने, संकेत वाजे आदींच्या पथकाने केली.