पुणे, ता. २२ : औंध-बाणेर क्षेत्रीय कार्यालयाच्या हद्दीत अभिमानश्री रस्ता, वेस्टएंड मॉल, भाले चौक परिसरात अनधिकृत कच्चे शेड, फ्रंट व साइड मार्जिनवर झालेल्या अतिक्रमणांवर अतिक्रमणविरोधी विभागामार्फत कारवाई करण्यात आली. या कारवाईत १० काउंटर, २ हातगाड्या, १७ इतर अतिक्रमण प्रकार व २० कच्चे-पक्के शेड हटविण्यात आले असून, पाच ट्रक साहित्य जप्त करण्यात आले आहे.
या कारवाईसाठी परिमंडळ क्रमांक एककडील संपूर्ण अतिक्रमण कर्मचारी, महाराष्ट्र सुरक्षा बलाचा एक गट, पोलिस कर्मचारी, बिगारी सेवक, चार सहायक अतिक्रमण निरीक्षक, तीन ओपन ट्रक, दोन पिंजरा वाहने व एक जेसीबी अशा यंत्रणेचा वापर करण्यात आला. ही कारवाई अतिक्रमण विभागाचे उपआयुक्त संदीप खलाटे व महापालिकेचे सहायक आयुक्त गिरीश दापकेकर यांच्या मार्गदर्शनाखाली अतिक्रमण निरीक्षक राहुल बोकन, सहायक निरीक्षक राहुल डोके, वैभव जगताप, हाशम पटेल व पंकज आवाड यांच्या पथकाने केली. अनधिकृत अतिक्रमणांवर यापुढेही नियमितपणे आणि ठोसपणे कारवाई केली जाईल, अशी माहिती अतिक्रमण निरीक्षक राहुल बोकन यांनी दिली.