पुणे, ता. २४ : तीन अल्पवयीन मुलांनी शाळेत निघालेल्या विद्यार्थ्यास शिवीगाळ व मारहाण करत डोक्यात धारदार शस्त्राने वार केले. ही घटना मंगळवारी नऱ्हे परिसरात घडली.
पोलिसांनी दिलेल्या माहितीनुसार, नऱ्हे परिसरातील एका शाळेत १५ वर्षीय विद्यार्थी शिक्षण घेत आहे. मंगळवारी सकाळी साडेसहाच्या सुमारास संबंधित विद्यार्थी जाधवर शाळेच्या रस्त्यावरील जैद रद्दी डेपो अँड स्क्रॅप सेंटर येथून जात होता. त्यावेळी तेथून जाणाऱ्या तीन अल्पवयीन मुलांनी विद्यार्थ्याला अडविले आणि धमकाविले. या घटनेने विद्यार्थी घाबरून पळू लागला. त्यावेळी तिघांनी त्यास शिवीगाळ करत मारहाण केली तर एकाने त्याच्या डोक्यावर कठीण वस्तूने मारले.
या घटनेत विद्यार्थी गंभीर जखमी झाला, त्याने मदतीसाठी आरडाओरडा केल्यानंतर काही नागरिक त्याच्या मदतीसाठी धावून गेले. त्यानंतर मारहाण करणारे मुले घटनास्थळावरून पळून गेले. या प्रकरणी तिघांविरोधात भारतीय न्याय संहितेच्या कलम ११८ (१) आणि बालक संरक्षण अधिनियमांतर्गत कलम ३ (५) नुसार गुन्हा दाखल केला आहे. सिंहगड रस्ता पोलिस तपास करत आहेत.