पुणे, ता. २४ : पुण्यातील कंपनी सोडून नाशिक येथील कंपनीत नोकरीसाठी गेल्यानंतर पूर्वीच्या कंपनीची माहिती पळविण्याचा आरोप असलेल्या चार कर्मचाऱ्यांना बेदम मारहाण करण्यात आली.
याप्रकरणी संदीप कैलास लवाटे (वय २८, रा. गणेशनगर, ता. मनमाड, नाशिक) यांनी मारहाण करणाऱ्यांविरुद्ध कोथरूड पोलिस ठाण्यात फिर्याद दाखल केली आहे. या घटनेत फिर्यादीसह योगेश दुसाने, सचिन केदार व प्रवीण गायकवाड (सर्व रा. नाशिक) हे जखमी झाले आहेत. लवाटे, दुसाने, केदार, गायकवाड हे चौघेजण पुण्यातील लोहिया आयटी पार्क परिसरातील एका कंपनीत नोकरीला होते. मार्च महिन्यात संबंधित कंपनीची नोकरी सोडून ते नाशिक येथील शिवांजली सोलर कंपनीत रुजू झाले.
दरम्यान, संबंधित कर्मचारी हे जुन्या कंपनीचे ग्राहक व माहिती पळवत असल्याचा तक्रार अर्ज १६ जुलैला कोथरूड पोलिस ठाण्यात देण्यात आला होता. त्याविषयी आपली बाजू मांडण्यासाठी संबंधित कर्मचारी २१ जुलैला नाशिक येथून पुण्याला आले होते. त्यांनी कोथरूड पोलिस ठाण्यात जाऊन आपली बाजू मांडत त्यांच्यावरील आरोप खोडून काढले होते. पोलिसांनी मध्यस्थी करून संबंधित प्रकरण मिटविले. त्यानंतर कर्मचारी त्यांच्या मोटारीने नाशिकला परतण्यासाठी निघाले होते. त्यावेळी आनंदनगर मेट्रो स्टेशनजवळ दुचाकीवरून आलेल्या पूर्वीच्या कंपनीच्या काही कर्मचाऱ्यांनी त्यांचा पाठलाग करत त्यांच्या मोटारीला धडक दिली. या घटनेनंतर कर्मचारी मोटारीमधून उतरल्यानंतर आरोपींनी त्यांना अडवून लाथा-बुक्क्यांनी जबर मारहाण केली. या घटनेत चारही जण जखमी झाले.