पुणे, ता. ३ : छत्रपती संभाजीनगरमध्ये अन्याय झाल्याने पुण्यात आलेल्या एका तरुणीला पोलिसांनी चौकशीदरम्यान जातिवाचक शिवीगाळ केल्याचा आरोप तिच्यासह इतर तरुणींनी केला आहे. याप्रकरणी पोलिसांनी अद्याप गुन्हा दाखल न केल्याने संघटनेच्या कार्यकर्त्यांनी पोलिस आयुक्त कार्यालयासमोर ठिय्या देत संताप व्यक्त केला. दरम्यान, आमदार रोहित पवार यांनी रविवारी रात्री वरिष्ठ पोलिस अधिकाऱ्यांची भेट घेत संबंधितांवर कारवाई करण्याची मागणी केली. त्यानंतर त्यांनी ठिय्या आंदोलन केले.
छत्रपती संभाजीनगरमधील एका तरुणीवर अन्याय झाल्याने ती आश्रयासाठी पुण्यात आली. येथे राहत असलेल्या तीन तरुणींकडे ती काही काळासाठी त्यांच्या घरी आश्रयाला आली होती. त्यानंतर एका महिला पोलिस अधिकाऱ्याने या तरुणींना चौकशीसाठी बोलावले. यावेळी त्या महिला अधिकाऱ्याने जातिवाचक शिवीगाळ करून अपमानजनक वागणूक दिल्याचा आरोप तरुणींनी केला आहे.
रोहित पवार म्हणाले, ‘‘पोलिसच जातिवाचक अपशब्द वापरून, अशा प्रकारे तरुणींशी वागू शकतात, तर आपण कुठल्या समाजात जगतोय, हे अतिशय गंभीर आहे. या प्रकरणात संबंधित तरुणी पोलिस ठाण्यात फिरत राहिल्या, मात्र त्यांची तक्रार नोंदवून घेण्यात आलेली नाही. या प्रकरणात संबंधित पोलिस अधिकाऱ्यांवर कारवाई करण्यात यावी.’’
या संदर्भात वरिष्ठ पोलिस अधिकाऱ्यांशी संपर्क साधण्याचा प्रयत्न केला. मात्र त्यांनी याबाबत काही प्रतिक्रिया दिली नाही.
------