पुणे, ता. ३ : राज्यभरातील सहा विभागांमध्ये रंगलेल्या चुरशीच्या स्पर्धेनंतर आता गुरुवारी (ता. ४) ‘सकाळ करंडक’ आंतरमहाविद्यालयीन एकांकिका स्पर्धेची महाअंतिम फेरी रंगणार आहे. राज्यभरातून निवडलेल्या सहा विभागांतील सहा सर्वोत्कृष्ट एकांकिकांचे सादरीकरण बालगंधर्व रंगमंदिरात होणार असून त्यातून स्पर्धेचा ‘महाविजेता’ निवडला जाणार आहे. ज्येष्ठ अभिनेत्री रोहिणी हट्टंगडी यांच्या हस्ते सायंकाळी ६.३० वाजता स्पर्धेचे पारितोषिक वितरण केले जाणार आहे.
‘रांजेकर रियल्टी’ आणि ‘बुलडाणा अर्बन को. ऑप. क्रे. सोसायटी’ हे या स्पर्धेचे प्रायोजक असून ज्येष्ठ दिग्दर्शक चंद्रकांत कुलकर्णी हे या स्पर्धेचे सांस्कृतिक दूत आहेत. गेल्या महिन्याभरापासून राज्यभरात या स्पर्धेचा उत्साह पाहायला मिळाला. विविध शहरांमध्ये युवा कलाकारांच्या आश्वासक सादरीकरणांनी सकाळ करंडक एकांकिका स्पर्धेची विभागीय अंतिम फेरी रंगली.
पुणे, मुंबई, कोल्हापूर, छत्रपती संभाजीनगर, नागपूर आणि नाशिक या सहा विभागांमध्ये झालेल्या या फेरीत शंभरहून अधिक महाविद्यालयांनी सहभाग घेतला होता. अनुभवी कलाकारांनी या फेरीसाठी परीक्षक म्हणून काम पाहिले. या विभागांमध्ये प्रथम क्रमांक पटकावलेल्या एकांकिकांची महाअंतिम फेरीसाठी निवड करण्यात आली. गुरुवारी सकाळी ११ वाजेपासून बालगंधर्व रंगमंदिरात या सहा एकांकिकांचे सादरीकरण होणार आहे. स्पर्धेनंतर सायंकाळी लगेचच निकालाची घोषणा होणार असून विजेत्या संघांना पारितोषिकांनी गौरविले जाणार आहे. या एकांकिका पाहण्यासाठी विनामूल्य प्रवेश असून रसिकांनी विद्यार्थी कलाकारांना प्रोत्साहन देण्यासाठी आवर्जून उपस्थित राहावे, असे आवाहन ‘सकाळ’ने केले आहे.
चंद्रकांत कुलकर्णी उपस्थित राहणार
सकाळ करंडक स्पर्धेची महाअंतिम फेरी पाहण्यासाठी स्पर्धेचे सांस्कृतिक दूत व ज्येष्ठ दिग्दर्शक चंद्रकांत कुलकर्णी हे उपस्थित राहणार आहेत. तसेच, ज्येष्ठ अभिनेत्री रोहिणी हट्टंगडी या देखील स्पर्धेदरम्यान उपस्थित राहणार असून त्यांच्या हस्ते सायंकाळी विजेत्या संघांना आणि स्पर्धकांना पारितोषिकांनी गौरविले जाणार आहे.
महाअंतिम फेरीचे वेळापत्रक (वेळ, विभाग, एकांकिकेचे नाव या क्रमाने) :
१) सकाळी ११ ते १२ : छत्रपती संभाजीनगर विभाग : ‘बुजगावणं’
२) दुपारी १२ ते १ : नाशिक विभाग : ‘कॅनल’
३) दुपारी २ ते ३ : कोल्हापूर विभाग : ‘ग्वाही’
४) दुपारी ३ ते ४ : नागपूर विभाग : ‘वि. प्र.’
५) दुपारी ४ ते ५ : पुणे विभाग : ‘इन बिटवीन ऑफ’
६) सायंकाळी ५ ते ६ : मुंबई विभाग : ‘थिमक्का’
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.