कोळोगाव धरणात केवळ २१ टक्के पाणी

पांडे ः सोलापूर तसेच धाराशिव जिल्ह्याच्या सरहद्दीवर असणाऱ्या करमाळा तालुक्यातील आवाटीजवळ असणाऱ्या सीना कोळेगाव धरणाच्या पाण्याची पातळी बाष्पीभवनाने दिवसेंदिवस घटत असून, धरणात अवघे २१ टक्के पाणीसाठा राहिला आहे. धरणात शिल्लक राहिलेल्या पाण्याचे योग्य नियोजन करून पाणी वापर करावे, असे आवाहन संबंधित कोळगाव धरणाच्या वरिष्ठ अधिकाऱ्यांनी केले आहे. करमाळा तालुक्यातील विशेषतः पूर्व भागातील वरदायिनी ठरलेल्या कोळगाव धरणाचे पाणी कडक उन्हामुळे दिवसेंदिवस कमी होत चालले आहे. धरणात सध्या २१.४८ टक्के पाणी शिल्लक आहे. तापमानातील वाढत्या बदलामुळे पाणी दिवसेंदिवस बाष्पीभवनामुळे कमी होत चालले आहे. करमाळा तालुक्यातील विशेषतः पूर्व भागातील हिसरे, हिवरे, निमगाव कोळगाव आवाटी, नेरले, सालसे, गौंडरे बोरगाव, दिलमेश्वर आदी भागातील शेतकऱ्यांना या धरणाचा मोठा फायदा होतो.